Artıq “WhatsApp”da məlumatları pulsuz saxlamaq olmayacaq

“WhatsApp” istifadəçiləri bəzi proqram məlumatlarını pulsuz saxlamaq imkanını itirəcək.

Lent.az xəbər verir ki, “WhatsApp”ın “Android” versiyasının istifadəçiləri daha əvvəllər olduğu kimi, söhbətlərin və fotoların ehtiyat nüsxələrini “Google Disk”də pulsuz saxlaya bilməyəcəklər.

Şirkət rəsmi olaraq bildirib ki, beta istifadəçiləri üçün dəyişikliklər bu ilin dekabrında, messencerin bütün digər Android istifadəçiləri üçün isə 2024-cü ilin birinci yarısında qüvvəyə minəcək. İstifadəçilər yeni qaydaların tətbiqindən bir ay əvvəl xəbərdarlıq alacaqlar.

“Google” “WhatsApp” söhbətinin ehtiyat nüsxəsinin mövcud “Google Disk” sahəsi əsasında işləməyə davam edəcəyini təsdiqləyib. Bununla belə, pulsuz plan yalnız 15 GB məlumatla gəlir, yəni bəzi istifadəçilər əlavə bulud yaddaşına ehtiyac duya bilər və ya lazımsız məlumatları silməli olacaqlar. “WhatsApp”da məlumatların silinməsi onu “Google Disk” ehtiyat nüsxənizdən də siləcək.

iOS-da WhatsApp istifadəçiləri üçün bu şərtlər əvvəldən tətbiq edilir. Üstəlik, Apple yalnız 5 GB pulsuz bulud yaddaşı təqdim edir.

Qeyd edək ki, “Google Disk” ehtiyat nüsxələri WhatsApp söhbətlərini və onların məzmununu ötürmək və saxlamaq üçün istifadə olunur. Cihazı dəyişdirərkən istifadəçi öz hesabına daxil ola və bütün məlumatları ehtiyat nüsxə vasitəsilə bərpa edə bilər. “WhatsApp” bulud yaddaşından istifadə etmədən əl ilə ötürmə imkanı da təqdim edir.