Serebral iflic olan uşaqlar xaricə müalicəyə göndərilir

“İrsi xəstəlikləri olanlar xaricdə müalicə almaq üçün Səhiyyə Nazirliyinin Vətəndaşların Respublikadan Kənar Müalicəyə Göndərilməsi üzrə Komissiyasına müraciət edir”.

Lent.az-ın məlumatına görə, bunu Komissiyanın sədri Nəsib Quliyev deyib.

N.Quliyev bildirib ki, Komissiyasının əsasnaməsində yazılıb ki, obyektiv səbəbdən ölkə daxilində xəstəliyin müalicəsi mövcud deyilsə, həmin xəstəni ölkədən kənarda müalicəyə göndərmək olar: “Son 2 ildə xaricə göndərilən xəstələr əsasən qrup şəkildə kurs müalicəsi almaq üçün olan xəstələrdir. Uşaqlar arasında xaricə göndərilənlər isə mərkəzi sinir sisteminin zədələnmələri, xüsusilə uşaq serebral iflici olanlardır. Bunlar 3-4 qrup şəklində Türkiyədə uşaq reabilitasiya mərkəzinə göndərilir.

Eyni zamanda böyüklər arasında spinal, yəni onurğa beyni zədələnmiş xəstələr Ukraynanın Krım şəhərinə göndərilirdi. Bu torpaqlar Rusiyanın tabeçiliyinə keçdiyindən və onlarla hələ müqavilə olmadığından böyüklər də Türkiyəyə göndərilir”.

N. Quliyev bildirib ki, bəzən insanlar irsi xəstəliyə yoluxur və müalicəsi üçün xaricə göndərilməklə bağlı müraciət edir: “ Amma unutmaq lazım deyil ki, irsi xəstəlik genlə ötürülür və bu irsi olaraq varsa, onu müalicə etmək mümkün deyil”.

N.Quliyev əlavə edib ki, Komissiyanın problemləri əsasən orqan köçürmə ilə bağlı olur: “Bəzən müəyyən orqanların köçürülməsi ilə bağlı yardım üçün bizə müraciət edirlər. Amma üzvlərin və toxumaların transplantasiyası, köçürülməsi və protezləşdirilməsi komissiyanın səlahiyyətinə aid deyil”.