Tibbi Reabilitasiya Xəstəxanasına qəbul edilən xəstələrin sayı açıqlanıb

9 may 2012-ci ildən bu günə qədər 2990 xəstə Səhiyyə Nazirliyinin Tibbi Reabilitasiya Xəstəxanasına qəbul olunub.

Səhiyyə Nazirliyindən Lent.az-a verilən məlumata görə, bu barədə Səhiyyə Nazirliyinin Tibbi Reabilitasiya Xəstəxanasında bu gün keçirilmiş tədbirdə deyilib.

Bildirilib ki, onlardan 1656–sı uşaq, 1334-ü isə analardır. Müalicə alan 1900 xəstədən 1375-i nevroloji statuslu, 229-u terapevtik, 154-ü hərəkət-dayaq sistemi xəstəlikləri, 83-ü kardioloji, 40-ı endikrinoloji xəstələr olub. 1375 nevroloji statuslu uşaqlardan 996-sı USİ xəstəliyi ilə daxil olub.

Qeyd edək ki, Tibbi Reabilitasiya Xəstəxanası H.Əliyev fondunun təşəbbüsü ilə əsaslı təmirdən sonra 2011-ci ildə istifadəyə verilib. Geniş profilli, nevroloji, kardioloji, endokrinoloji, hərəkət-dayaq profilli xəstələrin bərpası və müalicəsi, sağlamlığının bərpasının həyata keçirən müalicə-profilaktika müəssisəsidir. 40 çarpayılıq, 2 şöbədən ibarət (stasionar və fizioterapiya) şöbələr müasir avadanlıqla təmin olunub.