[b]IX illik bazadan kolleclərə qəbul yeni qaydalarla keçiriləcək[/b]

IX sinif buraxılış imtahanlarında iştirak etməyən şagirdlər aldıqları arayışla ancaq 9 il məktəbə gedib-gəldiklərini sübut edə biləcəklər. Lent.az-ın məlumatına görə, bunu Dövlət İmtahan Mərkəzinin (DİM) sədri Məleykə Abbaszadə bu gün keçirdiyi brifinqdə deyib. M. Abbaszadənin sözlərinə görə, verilən arayış şagirdin bilik səviyyəsini, IX illik təhsil proqramını mənimsəməsini təsdiq etmir.

DİM sədri qeyd edib ki, IX illikdən orta ixtisas təhsili müəssisələrinə yeni qəbul qaydaları da artıq hazırlanıb: "Bu, orta ixtisas təhsili müəssisələrinə qəbulla bağlı yeni qayda və normativ sənədlərdir. Gələn həftə bu sənədi Nazirlər Kabinetinə təqdim edəcəyik. Bu məsələ Təhsil Nazirliyi ilə birgə müzakirə olunub".

M. Abbaszadə əlavə edib ki, bu il də IX sinif buraxılış imtahanlarının nəticələri məzunlara imkan verəcək ki, ümumi orta təhsil ( IX) bazasından orta ixtisas təhsili müəssisələrinə sənəd versinlər. Bu il də IX sinif şagirdlərinin illik qiyməti deyil, buraxılış imtahan nəticələri orta ixtisas təhsili müəssisələrinə müsabiqə balı kimi qəbul ediləcək.