Dondurmanın bilmədiyimiz FAYDALARI

Dondurma yalnız sevilən yay deserti deyil, həm də müəyyən faydalı xüsusiyyətlərə malik məhsul hesab olunur. Mütəxəssislərin fikrincə, o, stress səviyyəsini azaltmağa kömək edə və orqanizmi kalsiumla təmin edə bilər. Bununla yanaşı, yüksək şəkər və yağ tərkibi səbəbindən onun həddindən artıq istifadəsi sağlamlıq üçün risklər yarada bilər.

Lent.az xarici mediaya istinadla xəbər verir ki, dietoloqların sözlərinə görə, dondurmanın əsas üstünlüklərindən biri insanın emosional vəziyyətinə müsbət təsir göstərməsidir. Bu desertdən alınan zövq stress səviyyəsinin azalmasına kömək edir və qidaya sağlam münasibətin bir hissəsi hesab oluna bilər.

Dietoloqlar qeyd edib ki, klassik dondurmanın tərkibində süd və qaymaq olur ki, bunlar da kalsium və asan mənimsənilən zülal mənbəyi sayılır. Bununla belə, məhsulun tərkibindəki yüksək şəkər və heyvan mənşəli yağlar bu faydaları azalda bilər.

Dietoloqların sözlərinə görə, şəkər yüksək enerji dəyərinə malik olsa da, vitamin, mineral və lif ehtiva etmir. Bu isə artıq çəki, maddələr mübadiləsi problemləri və digər xəstəliklərin yaranma riskini artırır. Həmçinin artıq heyvan yağları mədəaltı vəzi və qaraciyərin fəaliyyətinə əlavə yük yarada, ateroskleroz riskini yüksəldə bilər.

Əlavə edilib ki, mağazalarda satılan bir çox dondurma növündə süd yağını əvəz edən rafinə edilmiş bitki yağları – palma, soya, raps və digər yağ qarışıqları, həmçinin stabilizatorlar və aromatizatorlar istifadə olunur. Bu əlavələr məhsulun potensial faydasını müəyyən qədər azaldır.

Ekspertlər balanslı qidalanma çərçivəsində dondurmanın ölçülü şəkildə qəbul edilməsinin daha məqsədəuyğun olduğunu bildirirlər.