Düşmən Tərtərdə qəbiristanlığı atəşə tutdu, ölənlərin sayı 4-ə çatdı - YENİLƏNİB

Ermənistan ordusu Tərtərdə dəfn zamanı qəbiristanlığı atəşə tutması nəticəsində ölənlərin sayı 4-ə çatıb.

APA-nın Qarabağ bürosunun xəbərinə görə, hadisə zamanı yaralanan 1967-ci il təvəllüdlü Əmirov İsgəndər Yelmar oğlu da vəfat edib.

***

14:47

Ermənistan Silahlı Qüvvələrinin Tərtərdə qəbiristanlığı atəşə tutması nəticəsində ölən və yaralananların adları açıqlanıb.

APA-nın Qarabağ bürosunun xəbərinə görə, hadisə nəticəsində Rüstəmov Vasif Bahadur oğlu (1962), Orucov Pərviz Novruz oğlu (1989), Zamanov Şakir Xasay oğlu (1988) həlak olub, Məmmədov Füzuli Əli oğlu (1966), Əmirov Nofəl Yelmar oğlu (1968), Əmirov İskəndər Yelmar oğlu (1967), Allahverdiyev Elsevər Vəli oğlu (1979) və Qəzənfərli Rafael Qəzənfər oğlu (1986) isə yaralanıb.

***

14:03

Ermənistan Silahlı Qüvvələrinin Tərtərə hücumu nəticəsində 3 azərbaycanlı mülki şəxs həlak olub.

Lent.az-ın xəbərinə görə, bu barədə Azərbaycan Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri, Hikmət Hacıyev "Twitter"də bildirib.

O qeyd edib ki, Ermənistan Silahlı Qüvvələrinin Tərtərdəki qəbiristanlığı hücumu nəticəsində 3 mülki şəxs həlalk olub. 3 nəfər isə yaralanıb.

"Ermənistan humanitar atəşkəsin arxasında gizlənərək dinc insanlara qarşı terror siyasəti yürüdür. Azərbaycan öz mülki şəxslərini qorumaq üçün suveren hüququnu özündə saxlayır", - deyə Hikmət Hacıyev qeyd edib.