Həddindən artıq gigiyena hər kəs üçün lazım deyil və bəzi hallarda dəriyə zərər verə bilər. Bir çox insan üçün gündə iki dəfə duş qəbul etmək, xüsusilə isti havalarda, şəxsi qulluq vərdişinin ayrılmaz hissəsinə çevrilib.
Lent.az xarici mediaya istinadən xəbər verir ki, bu qədər tez-tez yuyunmaq hər kəs üçün vacib deyil və bəzi hallarda dərinin vəziyyətini pisləşdirə bilər.
Səhər duşunun faydaları
Səhər duşu gecə ərzində dəridə toplanan tər, dəri yağı və müxtəlif çirkləri təmizləməyə kömək edir. Yuxu zamanı yataq dəstində və dərinin səthində tər hissəcikləri, bakteriyalar və sebum yığılır. Buna görə səhər duşu insanı təravətləndirir və daha enerjili hiss etməsinə kömək edir.
Dermatoloq Dənni Qo bildirir ki, səhərlər duş qəbul etməyi sevməyənlər üçün bəzən sadəcə üz yumaq da müəyyən qədər kömək edə bilər. Lakin isti gecədən sonra tam duş qəbul etmək daha faydalıdır, çünki artıq tər və yağ dəridə qıcıqlanma və səpkilərin yaranmasına səbəb ola bilər. Səhər duşu yalnız təmizlik baxımından deyil, həm də orqanizmin daha tez ayılmasına kömək edir və gündəlik rejimin formalaşmasını dəstəkləyir.
Hər gün eyni vaxtda oyanmaq yuxunun keyfiyyətinə müsbət təsir göstərir və səhər ritualı bu vərdişin möhkəmlənməsinə kömək edir. Mütəxəssislərin sözlərinə görə, səhər sərin duş qəbul etmək əhval-ruhiyyəni yaxşılaşdıra və gün boyu gümrahlığı artıra bilər.
Axşam duşu niyə faydalıdır?
Axşam saatlarında isti duş qəbul etmək orqanizmin rahatlamasına və yuxuya hazırlanmasına kömək edir. İsti su ilə təmasdan sonra bədən temperaturu tədricən aşağı düşür və məhz temperaturun azalması yuxuya getmək üçün təbii siqnallardan biri hesab olunur.
Ekspertlər yatmazdan təxminən bir-iki saat əvvəl duş qəbul etməyi tövsiyə edirlər. Bu vərdiş daha tez yuxuya getməyə və daha keyfiyyətli istirahət etməyə kömək edir.
Gündüz duş qəbul etmək lazımdırmı?
Əksər hallarda gündüz duş qəbul etməyə ehtiyac olmur. Mütəxəssislər qeyd edirlər ki, gündüz duşu əsasən fiziki fəaliyyət, iş və ya isti hava səbəbindən dəri və ya geyim çirkləndikdə vacib olur. Xüsusilə məşqdən sonra duş qəbul etmək çox önəmlidir.
Uzun müddət tərlə islanmış paltarda qalmaq saç follikullarının iltihabına, dəri qıcıqlanmasına, göbələk infeksiyalarına və ya səpkilərə səbəb ola bilər. Bu problemlər ən çox sinə, kürək və budun daxili hissələrində müşahidə olunur.
Kimlər üçün gündə iki dəfə duş faydalıdır?
Bəzi insanlar üçün daha tez-tez yuyunmaq həqiqətən faydalı ola bilər. Məsələn, mövsümi allergiyadan əziyyət çəkən şəxslər üçün axşam duşu dəridən və saçlardan tozcuqları təmizləməyə kömək edir. Səhər duşu isə gecə ərzində bədənə və yataq dəstinə çökmüş hissəcikləri aradan qaldırır.
Bununla yanaşı, dermatoloqlar xəbərdarlıq edirlər ki, isti su ilə çox tez-tez təmas dərinin qurumasına səbəb ola bilər. Bu xüsusilə həssas və ya quru dəriyə sahib insanlara aiddir. Tez-tez yuyunmaq nəticəsində dərinin səthindəki təbii qoruyucu yağlar yuyulub gedir və qoruyucu baryer zəifləyir.
Nəticədə quruluq, qıcıqlanma və dartılma hissi yarana bilər. Bu problemlərin qarşısını almaq üçün mütəxəssislər duşdan sonra dəri tipinə uyğun nəmləndirici krem istifadə etməyi tövsiyə edirlər. Ən yaxşı nəticə üçün kremi duşdan sonra ilk 1-2 dəqiqə ərzində, dəri hələ nəmkən tətbiq etmək məsləhətdir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
