İsti çay soyuq sudan daha yaxşı sərinləşdirə bilər, amma şərtləri var...

İsti çay orqanizmin təbii soyuma mexanizmini gücləndirə bilər. Lakin bu təsir hər şəraitdə baş vermir.

Lent.az xəbər verir ki, geniş yayılmış fikrin əksinə olaraq, isti havada bir fincan isti çayı içmək orqanizmin yüksək temperaturun təsirinə daha rahat uyğunlaşmasına kömək edə bilər. Ancaq bu effekt yalnız müəyyən şərtlər daxilində yaranır və insan orqanizminin təbii termorequlyasiya sistemi ilə bağlıdır.

Məlumata görə, isti içki qəbul etdikdən sonra bədən temperaturu qısa müddətə yüksəlir və bu, daha güclü tərləməni stimullaşdırır. Əgər tər dərinin səthindən sərbəst şəkildə buxarlana bilirsə, orqanizm istiliyi daha effektiv şəkildə xaric etməyə başlayır. Nəticədə bir müddət sonra insan özünü daha sərin hiss edə bilər.

Mütəxəssislər bildirirlər ki, bu mexanizm əsasən havanın quru olduğu şəraitdə işləyir.

Əgər havada rütubət yüksəkdirsə və ya insan tərin buxarlanmasına mane olan qalın geyim geyinibsə, sərinləşdirici təsir əhəmiyyətli dərəcədə azalır yaxud ümumiyyətlə yox olur.

Məhz bununla Yaxın Şərq, Şimali Afrika və Asiyanın bir sıra ölkələrində insanların ən isti günlərdə belə isti qara çay yaxud nanəli çay içməsi ənənəsi izah olunur.

Quru iqlimdə və ya kondisionerli məkanlarda belə içkilər həqiqətən də orqanizmin təbii şəkildə soyumasına kömək edə bilər.

Bununla yanaşı, mütəxəssislər xatırladırlar ki, yayda özünü yaxşı hiss etməyin əsas şərti orqanizmdə su balansını qorumaqdır.

Bunun üçün həm sərin su, həm də şəkərsiz ilıq və ya isti çay içmək olar. Eyni zamanda çox soyuq içkilər bəzi insanlarda narahatlıq və ya mədə spazmlarına gətirib çıxarır.

Həkimlər həmçinin vurğulayırlar ki, isti çay öz-özlüyündə insanı həddindən artıq isinmədən qorumur.