Fərqli dada mənsub “Vupi” pirojnası: Çay süfrələrinizin bəzəyi

Hazırlanması çox asan olan bu amerikan pirojnasının hələ də dadına baxmamısınızsa, reseptini oxuyub tətbiq etməyə başlayın. Çay süfrələrinizi standart şirniyyatlardan xilas edəcək bir reseptdir.

Lent.az “Vupi” pirojnasının hazırlanma qaydasını təqdim edir:

Bizə lazım olan ərzaqlar:

Xəmir üçün

1 ədəd yumurta

80 qr kərə yağı

100 qr şəkər kirşanı

3 x/q kakao tozu

100 ml süd

130 qr ələnmiş un

1 ç/q qabartma tozu

1 q vanil

Krem üçün

150 ml qaymaq (35%)

4 x/q şəkər kirşanı

İndi isə gəldik hazırlanma qaydasına. Yağı əvvəlcədən soyuducudan çıxardırıq. Unu, kakao tozunu, qabartma tozunu və vanili qarışdırırıq. Yağı şəkər kirşanı ilə yumşalana və qabarana qədər qarışdırırıq. Yumurtanı üzərinə töküb, qarışdırmağa davam edirik. Daha sonra əvvəlcədən hazırladığımız un və kakaoya südü əlavə edərək qarışdırırıq. Bütün inqridientlər bir-birinə tam qarışana qədər bu prossesi davam etdiririk. Hazır olan xəmiri xörək qaşığı vasitəsilə sobanın qabına düzün. Çalışın ki, halqalarınız çox böyük olmasın. Çünki bişdikcə də həcmi artacaq. Sobanı 180 dərəcədə qızdırıb 10-12 dəqiqə bişirin.

Pirojnalarımız bişənə qədər biz kremi hazırlayaq. Şəkər kirşanı ilə qaymağı bir-birinə tam qarışana qədər çalın. Hazır olan pirojnaların ortasına kremi qoyun.Bizim fikrimizcə bu şirniyyatın hər hansı bir bəzəyə ehtiyacı yoxdur. Lakin siz zövqünüzə görə bəzək verə bilərsiniz. Nuş olsun!