Yeni ilin ilk premyerası olacaq

Azərbaycan Dövlət Gənc Tamaşaçılar Teatrında (GTT) yeni ilin ilk uşaq tamaşasının premyerası olacaq. Lent.az-ın məlumatına görə, yeni tamaşa 2000-ci ildə səhnələşdirilən və teatrın cari repertuarındakı ən maraqlı tamaşalardan biri olan “Dovşanın ad günü”dür. Görkəmli uşaq yazıçısı Xanımana Əlibəylinin anadan olmasının 95 illiyə həsr olunmuş tamaşa əsaslı bərpa olunaraq yenidən repertuara daxil edilib. İndiyədək 120 dəfə nümayiş etdirilmiş tamaşanın premyerası yanvarın 28-də saat 12.00 və 14.00-da - məktəblilərin qış tətili ərəfəsində baş tutacaq.

Xanımana Əlibəylinin eyniadlı əsəri əsasında hazırlanmış tamaşanın quruluşçu rejissoru xalq artisti Ağaxan Salmanlı, quruluşçu rəssamı Elşən Sərxanoğlu, rəqslərin quruluşçusu Vüsal Mehrəliyev, oranjemançısı Vasif Hüseynlidir. Tamaşada mərhum bəstəkar xalq artisti Şəfiqə Axundovanın bəstələrindən istifadə olunub.

Səhnə əsərində əsas rolları İradə Rəşidova, Roza İbadova, Sevinc Mehrəliyeva, Zümrüd Quliyeva, Təhminə Məmmədova, Zülfiyyə Alhüseynova, Mehriban Hüseynova, Nuriyyə Əliyeva, Eyvaz İbrahimov, Ramil Məmmədov, Ceyhun Məmmədov, Xaliq Bəkirov, Elnur Hüseynov, Elnur Əliyev, Vüsal Mehrəliyev, Yusif Dadaşov ifa edir.