“Rabitə”ni razı salan qələbə

Lent.az-ın məlumatına görə, Azərbaycan çempionun heyətində yer alan Staroviç 14 xal toplayıb.

“Aluprof”da isə ən yüksək göstəriciyə hərəyə 12 xal yığmış Natalya Bamber və Berenika Okunyevska imza atıb. Görüş komandamızın qələbəsi ilə nəticələnib – 3:0 (25:13, 25:23 25:12).

Oyundan sonra “Rabitə”nin baş məşqçisi Deyan Brdoviç nəticədən razı qaldığını bildirib: “Bu gün biz Polşada 6 gün öncəki çıxışımızdan daha yaxşı oynadıq. Oyunçularımız Polşanın ən güclü komandası üzərində vacib qələbə qazanmaq üçün hər şeyi düzgün etdilər”.

“Rabitə” növbəti görüşünü yanvarın 6-da İtaliyada “Skavolini”yə qarşı keçirəcək. Brdoviç həmin qarşılaşmada da qalib gəlməli olduqlarını bildirib: “Çünki bu, qrupumuzda liderin tam müəyyənləşməsi baxımından vacibdir”.

Komandamızın kapitanı Natalya Məmmədova isə oyunu yüksək səviyyədə keçirdiklərini söyləyib. Lakin o, ikinci hissədə top qəbulunda bəzi problemlərlə üzləşdiklərini etiraf edib: “Biz bu problemləri həll edə bildik və vacib qələbə qazandıq. Bu nəticədən çox razıyıq”.