Pişiklər də insanlar kimi özünəməxsus xarakterə və davranışa malikdir. Alimlər tüklərinin rəngi ilə xarakter arasında heç bir elmi əlaqənin olmadığını bildirsələr də, bir çox pişik sahibi eyni rəngə sahib heyvanların oxşar davranışlar sərgilədiyini deyir.
Lent.az xarici mətbuata istinadən xəbər verir ki, bu müşahidələr elmi cəhətdən təsdiqlənməsə də, xalq arasında pişiklərin rənginə görə xarakteri ilə bağlı maraqlı inanclar formalaşıb.
Alimlər nə deyir?
Elmi baxımdan pişiyin tük rəngi onun xarakterinə təsir etmir. Rəng genetik olaraq valideynlərdən balalara ötürülür və davranış xüsusiyyətləri ilə əlaqəli hesab edilmir. Buna baxmayaraq, xalq arasında müxtəlif rəngli pişiklərlə bağlı fərqli təsəvvürlər mövcuddur.
Qara pişiklər
Xalq inanclarında qara pişiklər uzun illər bədbəxtlik və sehrlə əlaqələndirilib. Lakin bunlar yalnız batil inanclardır. Əslində qara pişiklər də digər pişiklər kimi sahiblərinə sevinc gətirə bilər. Onların adətən mehriban və ünsiyyətcil olduqları, eyni zamanda yad insanlara qarşı daha ehtiyatlı davrandıqları düşünülür.
Ağ pişiklər
Ağ tüklü pişiklər nadir genə görə dünyaya gəlirlər. Bu gen daxili qulaqdakı hüceyrələrin inkişafına da təsir etdiyindən, mavi gözlü ağ pişiklərin bir qismi anadangəlmə kar olur. Xalq arasında onların sakit, utancaq və həssas xarakterə malik olduğu deyilir. Həmçinin digər pişiklərlə müqayisədə daha tez qorxduqları və evdəki başqa heyvanlarla uyğunlaşmaqda çətinlik çəkdikləri düşünülür.
Sarı (kürən) pişiklər
Narıncı rəngli pişiklərin təxminən 80 faizi erkək olur. Dişi kürən pişiklər isə kifayət qədər nadir rast gəlinir. Məhz bu rəngli pişiklər ən dəcəl, enerjili və oyunsevər hesab olunur. Bu xüsusiyyət o qədər məşhurlaşıb ki, ingilisdilli internetdə hətta "orange cat behavior" ("narıncı pişik davranışı") adlı məşhur mem yaranıb.
Kürən pişik sahibləri tez-tez evdə ora-bura qaçan, əşyaları sındıran və müxtəlif macəralara düşən ev heyvanlarının videolarını paylaşırlar. Xalq arasında belə hesab edilir ki, kürən pişik olan evdə darıxmaq mümkün deyil.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
