Pişiklər arasında baş verən münaqişələr o qədər dramatik görünə bilər ki, sahiblər bəzən onların bir daha barışmayacağını düşünür. Lakin bir müddət keçdikdən sonra heyvanlar sanki heç nə olmamış kimi yenidən yanaşı uzanırlar. Felinoloqlar bildirirlər ki, pişiklərin özünəməxsus barışıq sistemi var və bu, itlərdən tamamilə fərqlənir. Bu sistem instinktlərə və incə davranış siqnallarına əsaslanır.
Lent.az-ın xarici mediaya istinadən xəbərinə görə, əsas fərq ondadır ki, pişiklər insanlarda olduğu kimi “günahı etiraf etmə” anlayışını qəbul etmirlər. Onlar itlər kimi yaxınlaşıb “üzr istəmirlər”. Pişiklər üçün münaqişə sadəcə sərhədləri müəyyənləşdirmə üsuludur. Gərginlik azaldıqdan sonra isə onlar adi davranışlarına qayıdırlar. Dalaşandan sonra pişiklər bir müddət birbaşa təmasdan qaçırlar. Bu, onların bir-birinə sakitləşmək üçün vaxt vermə üsuludur.
Mütəxəssislər qeyd edir ki, barışıq neytral davranışlarla başlayır. Məsələn, heyvanlar eyni məkanda ola və ya yan-yana yemək yeyə bilərlər. Zaman keçdikcə aralarındakı məsafə azalır. Bu isə münaqişənin artıq bitdiyini göstərir. Bəzi hallarda pişiklər özlərini yumaq və ya gərnəşmək kimi davranışlardan istifadə edirlər. Bu jestlər onların sakit olduğunu və təhlükə yaratmadığını göstərir. Lakin onların birbaşa “barışıq jestləri” yoxdur. Yəni onlar yaxınlaşıb sığallanmaqla “bağışlanma istəmirlər”.
İtlər isə fərqli davranır: onlar təmas axtarır, başlarını aşağı salır və itaətkarlıq nümayiş etdirirlər. Pişiklər belə davranış göstərmirlər. Sahibin həddindən artıq müdaxiləsi vəziyyəti daha da gərginləşdirə bilər. Pişiklər bunu yeni bir təhlükə kimi qəbul edə bilərlər.
Mütəxəssislər heyvanlara şəxsi məkan verməyi tövsiyə edir. Onlar nə vaxt yenidən ünsiyyətə hazır olduqlarını özləri müəyyən edirlər. Bəzən resursların yem qablarının, yataq yerlərinin və oyuncaqların bölüşdürülməsi də kömək edir. Bu, rəqabəti azaldır və yeni münaqişələrin qarşısını alır.
Heyvanın bədən dilinə diqqət yetirmək də vacibdir. Əgər quyruq yuxarıdırsa və qulaqlar rahat vəziyyətdədirsə, pişik artıq barışığa hazırdır. Əgər pişik fısıldayır və ya üzünü çevirirsə, tələsməmək lazımdır. Pişiklərdə barışıq prosesi tədricən baş verir. Və bu baş verdikdə, hər şey çox təbii görünür. Pişiklər sadəcə yenidən yanaşı yaşamağa davam edirlər sanki heç nə olmayıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
