“Qanun” nəşriyyatının tərcüməçisi Ziya Muradov dağ yürüşü zamanı ölüb – Ailəsi ölümün araşdırılmasını istəyir

“Qanun” nəşriyyatının tərcüməçisi Ziya Muradovun ölüm xəbəri yayılıb.

Lent.az xəbər verir ki, bu barədə sosial şəbəkədə “Qanun” nəşriyyatının rəhbəri Şahbaz Xuduoğlu məlumat paylaşıb.

İlkin məlumata görə, Ziya Muradov Quba ərazisində 17 nəfərlik turist qrupu ilə dağ yürüşündə olarkən həyatını itirib. Hadisə ilə bağlı məlumatın indiyədək ictimaiyyətə açıqlanmadığı bildirilir.

Lent.az-ın əməkdaşı mərhumun ailə üzvləri ilə əlaqə saxlayıb. Ziya Muradovun bacısı Aytən xanım bildirib ki, hazırda Parisdə yaşayır və qardaşının ölüm xəbərini aldıqdan sonra ailəsinin yaşadığı Qazax şəhərinə gəlib.

Onun sözlərinə görə, ailə Ziya Muradovun ölümünün bəzi məqamlarının müəmmalı olduğunu düşünür və hadisənin araşdırılması üçün aidiyyəti qurumlara müraciət edib.

Mərhumun bacısı Ziya Muradovun ölüm səbəbinin dəqiq müəyyənləşdirilməsi məqsədilə qəbrin ekshumasiya olunmasını istədiklərini də bildirib.

Hadisə ilə bağlı əlavə məlumat əldə etmək üçün araşdırmamız davam edir.