Bakıda 2 yaşlı oğlanın əli ətçəkən maşında qaldı

3 saylı şəhər Xəstəxanasından Lent.az-a verilən məlumata görə, 2 yaşlı oğlan xəstəxanaya çatdırılıb. 2009-cu ildə anadan olmuş Əli Hüseynovu xəstəxanaya valideynləri gətirib. Qəbul olunan zaman 2 yaşı hələ tamam olmamış körpənin əli elektrik ət maşınında sıxılmış vəziyyətdə qalıbmış. Lakin həkimlərin səylərinə baxmayaraq, uşağın əlini aparatın içindən çıxarmaq mümkün olmayıb və körpə təcili tibbi yardım maşını ilə Fövqəladə Hallar Nazirliyinin Xüsusi Riskli Xilasetmə Xidmətinin Nərimanov postuna gətirilib.

Burada xilasedicilər təhlükəsizlik qaydalarına riayət etməklə xüsusi alət və avadanlıqlar vasitəsilə ət maşınının detallarını kəsib və uşağın əlini ət maşınından çıxarıb.

Ə.Hüseynov saat 21.00 radələrində 3 saylı şəhər Xəstəxanasının Təcili Tibbi Yardım Stansiyasının həkimlərinə təhvil verilib.

Nizam Rza