Yatsenyuk: “Biz Rusiyanın təbii qazından imtina edə bilmərik”

Ukraynanın baş naziri Arsenii Yatsenyuk bildirib ki, qarşıdan gələn qışı yola vermək üçün cari il Rusiyadan daha 7 milyard kub metr təbii qaz almalıdırlar.

Lent.az-ın “İTAR-TAAS”-a istinadən məlumatına görə, o, ölkəsinin birinci telekanalında çıxışında deyib ki, Ukrayna Rusiyanın “mavi yanacağından” imtina etməyə “hazır deyil”.

“Mən populist çıxış edə bilərdim. Ancaq bu doğru olmazdı. Biz Rusiyanın təbii qazından imtina edə bilmərik” - deyə, o, vurğulayıb.

Xatırladaq ki, Rusiya cari ilin fevralınadək qazın min kub metrini Ukraynaya 268,5 dollara satırdı. Ölkədə baş verən hakimiyyət dəyişikliyindən sonra “mavi yanacağın” qiymətini 485 dollara qaldırıb.