PKK jandarm və polis bölməsinə hücum etdi: 5 ölü, 36 yaralı - YENİLƏNİB

Terrorçular polis bölməsinə bomba yüklü maşın, roket və avtomatlarla hücum edib. Lent.az-ın Türkiyə mediasına istinadən xəbərinə görə, terrorçuların bomba yüklənmiş maşınının partlaması nəticəsində Diyarbəkir Polis İdarəsi böyük zərər görüb, onun yanındakı iki şəxsi ev isə tamamilə dağılıb. Bildirilir ki, terrorçularla hüquq-mühafizə orqanları arasında silahlı atışma 40 dəqiqə davam edib.

Yaralıların 6-sı polis, 8-i isə polislərin yaxınlarıdır.

06:15

Türkiyənin Diyarbəkir vilayətinin Çinar rayonunda baş verən terror aktı nəticəsində biri uşaq olmaqla 5 nəfər ölüb, 36 nəfər yaralanıb.

APA-nın BBC-yə istinadən verdiyi məlumata görə, terrorçular polis bölməsinin yaxınlığında minalanmış avtomobili partladıb, daha sonra binanı qumbaraatanlardan atəşə tutublar.

Bildirilir ki, terrorçular eyni anda üç müxtəlif yerə - polis şöbəsi, jandarm idarəsi və polis əməkdaşlarının xidməti mənzillərinə hücum edib. Xəstəxanalara yerləşdirilən yaralılardan vəziyyəti ağır olanlar var.

Qeyd edək ki, zərərçəkənlərin sayı ilə bağlı rəsmi məlumat verilməyib.

***

Türkiyənin Diyarbəkir vilayətinin Çinar rayonunda PKK terrorçuları polis bölməsinə silahlı hücum edib.

APA-nın “Anadolu” agentliyinə istinadən verdiyi məlumata görə, terrorçular tərəfindən törədilən partlayış nəticəsində mülki vətəndaşlar daxil olmaqla, 13 nəfər yaralanıb.

Əraziyə çox sayda polis və təcili yardım cəlb edilib. Polis bölməsinin binasına, ətrafdakı evlərə və ofislərə ciddi ziyan dəyib, bəzi küçələrdə elektrik enerji kəsilib

Hadisə yerindən qaçan terrorçuların yaxalanması üçün bölgədə əməliyyatlar davam edir.