Tailandda 12-ci dəfə hərbi çevriliş baş verdi - YENİLƏNİB

Mayın 22-də Tailanda hərbi çevriliş olub. Lent.az-ın xarici informasiya vasitələrinə istinadən məlumatına görə, ordu təmsilçisi ölkə əhalisinə telemüraciət edib. Ordu rəhbərliyi ölkədə hərbi çevriliş olduğunu, komendant saatı tətbiq edildiyini və mövcud konstitusiyanın fəaliyyətinin dayandırıldığını bildirib.

Hərbçilər ölkə ərazisində bütün telekanalların və radiostansiyaların yayımını qadağan edib.

Xatırladaq ki, hakimiyyətə qarşı etiraz aksiyalarının davam etməsi iki gün öncə hərbi vəziyyət rejiminin elan olunması ilə nəticələnmişdi.

Hərbçilər bildirib ki, hərbi vəziyyət rejimi ölkədə asayiş bərpa olunanadək davam edəcək.

Tailandın quru qoşunları komandanı general Prayut Çan- Oça müraciətində deyib ki, hakimiyyətin bütün səlahiyyətlərinin Milli Təhlükəsizlik üzrə Komitə həyata keçirəcək.

Onun sözlərinə görə, hərbçilərin hakimiyyəti ələ keçirməsinə baxmayaraq, ölkədə həyat öz axarı ilə davam edəcək.