Şotlandiyada müstəqillik referendumu keçirilir

Bu gün Şotlandiyada müstəqilliklə bağlı referendum keçirilir. Lent.az-ın “Əl-cəzirə”yə istinadən verdiyi xəbərə görə, referendum yerli vaxtla saat 07.00-da başlayıb. 16 yaşdan yuxarı 4 milyondan çox insan ölkədəki 2 min 608 seçki məntəqəsində axsam saat 22.00-yə qədər səs hüququndan istifadə edəcək.

Seçicilər bülletendəki “Şotlandiya müstəqil ölkə olmalıdırmı?” sualına “Bəli”, yaxud da “Xeyr” cavabını verməlidir.

Keçirilmiş rəy sorğuları müstəqillik tərəfdarları və müstəqillik əleyhdarlarının təxminən bərabər olduğunu göstərir.

Şotlandiya müstəqil olacağı təqdirdə 24 mart 2016-cı ildə rəsmən Böyük Britaniyadan ayrılacaq.

Şotlandiya İngiltərə, Uels və Şimali İrlandiya ilə birlikdə Böyük Britaniyanın tərkibindəki 4 ölkədən biridir. Şotlandiya Böyük Britaniyada 5,5 milyon əhali ilə İngiltərədən sonra ən çox əhalisi olan ikinci ölkədir.

Şotlandiya 1707-ci ildə şotland və ingilis parlamentləri tərəfindən qəbul edilmiş Birləşmə qanunu ilə Böyük Britaniyanın hakimiyyəti altına keçib.