Rusiyanın 3 vertolyotu Ukraynanın sərhədini pozub

Ukraynanın Xarici İşlər Nazirliyi Rusiyaya etiraz notası göndərərək, ölkənin hava məkanının “sistemli şəkildə pozulmasında” Moskvanı ittiham edib.

Lent.az-ın “BBC”-yə istinadən məlumatına görə, Rusiyaya göndərilən həmin sənəddə bu sayaq əməllərin dayandırılması və baş verən hadisələrin araşdırılması tələb olunub.

Ukrayna XİN-in məlumatına əsasən, yalnız iyulun 3-də dövlət sərhədi Rusiya tərəfindən bir neçə dəfə pozulub: “Rusiya tanınma nişanları ilə Ukraynanın hava məkanını “Mİ-8” və “Mİ-24” vertolyotları pozub. Onlar Luqansk vilayəti Blaqoşenka yaşayış məntəqəsində, özəlliklə “Aleksandrovka” buraxılış –məntəqəsi istiqamətində 5 km –lik dərinlikdə Ukrayna ərazisinə soxulub”.

Moskva hələlik Ukraynanın notasına cavab verməyib.

Xatırladaq ki, rəsmi Kiyev əvvəllərdə Rusiyaya oxşar notalarla etiraz edib. Ancaq Moskva bu diplomatik müraciətləri təkzib edərək, çeşidli bəhanələr irəli sürüb.