Rusiya büdcəsi 3 trilyon rubl itirir

Neftin 1 barelinin qiyməti 50 dollardan aşağı düşdüyü halda Rusiya büdcəsinin itkiləri 3 trln. rubl həcmində qiymətləndirilir.

APA-nın Rusiya bürosunun müxbiri xəbər verir ki, bu barədə Rusiyanın maliyyə naziri Anton Siluanov Qaydar forumunda çıxışı zamanı deyib.

“Biz hesab edirik ki, neftin bir barelinin qiymətinin 50 dollara qədər olmasına görə gəlirlərimizdə itkilər təxminən 3 trilyon rubl təşkil edəcək”, - deyə nazir əlavə edib.

A. Siluanov qeyd edib ki, büdcənin maliyyələşmə mənbələri ilə bağlı problemlər mövcuddur və buna uyğunlaşmaq lazımdır: “Neftin bir barelinin qiymətinin 100 dollar olduğu vaxtda xərclədiklərimizi indi dövlət xərcləyə bilməz”.

Qeyd edək ki, Fevral fyüçersinə görə İCE london birjasında Brent markalı neftin bir bareli 45,74 dollara satılır.