Onlar İŞİD-dən də təhlükəlidir - İDDİA

“Əl-Qaidə”-nin qolu “Xorasan” terror təşkilatı İŞİD-dən daha təhlükəlidir”. Lent.az-ın haberturk.com-a istinadən verdiyi xəbərə görə, bu iddia ilə “New-York Times” qəzeti çıxış edib.

ABŞ təhlükəsizlik qurumlarının hesabatlarına istinad edən “New York Times”in yazdığına görə, iki il əvvəl Suriyada fəaliyyətə başlayan “Xorasan” Yaxın Şərq, Cənub-şərqi Asiya və Şimali Afrika ölkələrindən gəlmiş “Əl-Qaidə” üzvlərindən təşkil olunub.

Təşkilata “Əl-Qaidə” liderlərindən Möhsün əl-Fadli rəhbərlik edir. 33 yaşlı Fadlinin vaxtilə, Üsamə Bin Ladenin yaxın çevrəsində olduğu deyilir. Fadli Suriyada müharibə başlamazdan əvvəl İranda yaşayıb. ABŞ kəşfiyyatı 10 ildən çoxdur ki, Fadlini axtarır.

ABŞ kəşfiyyatının hesabatlarına görə, “Xorasan” terror təşkilatı daha çox partlayıcı qurğulardan istifadə etməklə terror aktları təşkil edir.

İngiltərənin “İndependent” qəzetinin yazdığı xəbərə görə isə, “Xorasan” İŞİD-dən fərqli olaraq, xilafət arzusunda deyil. “Xorasan”ın əsas məqsədi ikinci 11 sentyabr hadisələri hazırlamaqdan ibarətdir.

Təşkilatın lideri Fadlinin xüsusilə, çətin aşkarlanan partlayıcı qurğular hazırladığı deyilir.

Analitiklər isə, İŞİD-in zəifləməsindən sonra “Xorasan”ın onun yerini tutacağı fikrindədir.