Obama və Kerri ABŞ-a səfər edəcək Netanyahu ilə görüşməyəcəklər

ABŞ dövlət katibi Con Kerri Vaşinqtona səfər edəcək İsrailin baş naziri Binyamin Netanyahu ilə görüşməyi planlaşdırmır. Bu barədə APA “Röyters”ə istinadən xəbər verir.

Məlumata görə, Binyamin Netanyahu ilə həmçinin ABŞ prezidenti Barak Obama da görüşmək niyyətində deyil.

“İsraildə keçiriləcək seçkilərə təsir cəhdlərinin yaranmaması üçün Obamanın Netanyahu ilə görüşmək niyyəti yoxdur”, deyə Ağ Ev yanında Milli Təhlükəsizlik Şurasının nümayəndəsi Bernadett Mixan bildirib.

Qərb mətbuatı bu qərarların təəccüblə qarşılandığını qeyd edib. Belə ki, indiyədək İsrail rəsmiləri Vaşinqtona səfərləri zamanı ABŞ rəhbərliyi ilə danışıqlar aparıb.

Qeyd edək ki, İsrailin baş naziri Vaşinqtona ABŞ Konqresində çıxış etmək üçün səfər edəcək.