İmamların qəbri olan məscidlər təhlükədə

“İraq Şam İslam Dövləti” –nin yaraqlıları Samarra şəhərini ələ keçirməyə çalışır.

Dünya şiələrinin əsas ziyarətgahlarından olan əl-Əsgəri məscidi bu şəhərdə yerləşir.

10-cu imam Əli əl-Naqi və 11-ci imam Həsən əl-Əsgərinin qəbri əl-Əsgəri məscidindədir. Məscid həm də onların mavzoleyidir.

Lent.az “Azadlıq Radiosu”na istinadən məlumatına görə, sünnü yaraqlıların cəmləşdiyi “İraq Şam İslam Dövləti” adlı təşkilat indiyəcən tutduğu şəhərlərdə bir sıra şiə ziyarətgahlarını dağıdıb. Onlar bu ziyarətgahları islama zidd sayırlar.

2006-cı ildə “əl-Qaidə”yə bağlı terrorçular məsciddə partlayış törədib qızıl günbəzi dağıtmışdılar. 2007-ci ildə isə məscidin minarələri də partladılmışdı.

Həmin terror aktları İraqda şiələrlə sünnülər arasında nifaqı daha da dərinləşdirmişdi. Məscid 2009-cu ildə bərpa edilmişdi.

Əl-Əsgəri məscidi 10-cu əsrdə tikilib.

Əli əl-Naqi və Həsən əl-Əsgəri Xəlifə Mötəsimin hərbi düşərgəsi olan Samarrada ev dustağı olublar və orada da dünyalarını dəyişiblər.

Radikal sünnü yaraqlıların İraqda son məqsədi paytaxt Bağdadı ələ keçirməkdir.

İstər Bağdadda, istərsə də Kərbəlada, Nəcəfdə şiəliyin ən

mühüm ziyarətgahları yerləşir.

Birinci imam Əlinin (Məhəmməd peyğəmbərin kürəkəni) qəbri Nəcəfdəki İmam Əli məscidindədir.

Kərbəlada İmam Hüseyn məscidi yerləşir. Məhəmməd peyğəmbərin Kərbəla savaşında öldürülmüş nəvəsi Hüseyn ibn Əlinin (üçüncü imam), eləcə də digər müqəddəslərin məqbərələri buradadır.

Əl-Abbas məscidi də Kərbəladadır. Abbas imamlar Həsən və Hüseynin qardaşı olub, Kərbəla çölündəki döyüşdə Hüseynin bayraqdarı Abbas idi.

Bağdaddakı əl-Qadimiyyə məscidində yeddinci imam Musa və doqquzuncu imam Məhəmməd Əl-Taqinin məqbərəsi yerləşir.

Bu şəhərlər hələ ki İraq hökumətinin nəzarətindədir.

Bundan başqa ziyarətgahları könüllülər də qoruyur.

İraqın Bağdad, Kərbəla və Nəcəf şəhərlərindəki şiə ziyarətgahlarının fotoları: