Gürcüstan erməni keşişinin döyülməsini “məişət məsələsi” adlandırıb

Tiflisdə Eçmiədzin kilsəsinin keşişinə hücumdan Ermənistan narahatlığını bildirib.

Lent.az-ın Ermənistan KİV-ə istinadən məlumatına görə,bunu Ermənistanın Xarici İşlər nazirliyinin sözçüsü Tiqran Balayan iyulun 21-də İrəvanda keçirdiyi mətbuat konfransında bəyan edib.

Onun sözlərinə görə, Gürcüstan rəhbərliyinin tərəfsiz və ətraflı istintaq aparacağını gözləyirlər.

Gürcüstanda erməni Apostol Kilsəsinin yaydığı bəyanatda qeyd edilib ki, iyulun 19-dakı olay erməni kilsəsinin yanında maşını saxlayan qadınla kilsəyə gələnlər və keşişlər arasında mübahisədən başlayıb.

Bundan sonra Tiflisinin 50-yə yaxın yerli sakini kilsənin yaxınlığında keşiş Manuk Zeynalyana hücum edərək, onu döyüb.

Gürcüstan tərəfi hadisənin etnik xarakterli olmadığın, adi məişət olay olduğunu bildirib.