Azərbaycanlı iş adamlarını incidirlər: “Bizi “41-ci kilometr”ə aparmaq istəyirlər

Azərbaycanlıların Moskvada alver etmələrinə süni maneələr yaradılıb. Bu barədə Lent. az Moskvada yaşayan iş adamlarından biri məlumat verib.

Məlumata görə, dünəndən Dağıstanla sərhəddə azərbaycanlı iş adamlarına məxsus tərəvəzlə dolu bir neçə yük maşını saxlanılıb. Hadisə yerindən Lent.az-a verilən məlumata görə, Dağıstanda həmyerlilərimizi məcbur edirlər ki, yük dolu maşınlar onların dediyi bazarlara getməlidir.

Əslən Şəmkirdən olan mal sahiblərinin dediyinə görə, hazırda Dağıstan ərazisindədirlər, və onları məcbur edirlər ki, mallarını Moskvada, “41-ci kilometr” adlanan bazarda satsınlar. “Həmin bazarda isə heç bir şərait yoxdur, mərkəzdən uzaqdır, yer haqqı həddindən artıq çoxdur” deyə sahibkar bildirib.

Onun dediyinə görə, “Pokrov” bazarı bağlanandan sonra azərbaycanlılar əsasən “Domodedovo” metrostansiyası yaxınlığındakı bazara üz tutublar. “Burda normal şərait var, yer haqqı da ucuzdur. Bazarda işləyənlər də azərbaycanlılardır. Bir problem yarananda diaspora qurumlarımız da operativ müdaxilə edir. Amma “41-ci kilometr”ə getsək, elə hesab edin ki, malı batırmışıq”.