APA-nın Avropa müxbiri xəbər verir ki, müzakirələrdə iştirak edən Azərbaycanın AŞPA-dakı nümayəndə heyətinin üzvləri Qırğızıstanı dəstəkləyib. Müzakirələrdə çıxış edən Azərbaycanın AŞPA-dakı nümayəndə heyətinin rəhbəri Səməd Seyidov bu təklifi müsbət qiymətləndirərək Qırğızıstanı Avropa ailəsində görməkdən məmnun olduğunu bildirib: “Bu gün müzakirə etdiyimiz hesabat çox önəmlidir. Burada təmsil olunduğum Avropa Demokratlar qrupu və Azərbaycan adından Qırğızıstandan olan bacı və qardaşlarımıza Assambleyaya gəlmələrinə xoş gəlmişsiniz deyirəm. Biz eyni ailəyə mənsubuq və bizim eyni tarix və köklərimiz var. Bu gün mən çox şadam ki, siz bizim aramızdasınız və bizim müdafiə etdiyimiz dəyərləri paylaşırsınız. Bu hesabat sizə etdiyimiz hədiyyə deyil, bu hesabat demokratiya, insan haqları və hüququn aliliyi naminə mübarizə aparmaq üçün bir dəvətdir. Siz buna nail ola bilərsiniz. Çünki sizin tarix, sizin təcrübə göstərir ki, Qırğızıstan bizim böyük evin üzvü ola bilər. Ümid edirəm ki, sizin ölkə Avropa Şurasının 47 üzvü ölkələrinin parlamentariləri ilə insan hüquqlarını müdafiə edəcək. İnsan hüquqları çətin bir məsələdir. Bu, sadəcə Avropa Şurasının ölkələrində deyil, sizin region üçün də əhəmiyyətlidir. Ümid edirəm ki, siz bu dövrdə önəmli olan hüququn aliliyini əldə edə biləcəksiniz. Əziz dostlar, əziz bacılar və qardaşlar Avropa demokratlar qrupu və Azərbaycan adından öz evinizə xoş gəlmişsiniz deyirəm. Bu gün siz öz evinizdəsiniz”.
Azərbaycanın AŞPA-dakı nümayəndə heyətinin üzvü, millət vəkili Qənirə Paşayeva çıxışında Qırğızıstanı dəstəkləyərək regionda indiki gərgin vəziyyət fonunda qurumun bu ölkəyə demokratiya üzrə tərəfdaş statusu verməsinin önəmli olduğunu vurğulayıb.
Qırğızıstana Assambleyada “Demokratiya naminə Tərəfdaş” statusunun verilməsi ilə bağlı müzakirələrdə çıxış edən Qənirə Paşayeva deyib: “Qırğızıstan Mərkəzi Asiya ölkələri arasında Assamleyamıza demokratiya üzrə tərəfdaş statusu üçün müraciət edən ilk ölkədir və onların bu addımı Assamleyamız tərəfindən ciddi şəkildə alqışlanmalı və dəstəklənməlidir. Bu addımı atmaqla Qırğızıstan ən yaxşı Avropa praktikasını və özünün gələcək inkişaf yolunda Avropa Şurası standartlarını seçdiyini göstərib. Qeyd etmək istəyirəm ki, Qırğızıstan xalqı, parlamenti Avropa Şurası dəyərlərinin, insan haqları, demokratiya, söz azadlığı, azad və demokratik seçkilər, qanun aliliyi ilə bağlı dəyərlərin ölkələrində möhkəmlənməsi istiqamətində ciddi addımlar atır və çox önəmli amma asan olmayan bir bölgədə yerlşən Qırğızıstanın bu addımları ciddi dəstəklənməlidir”.
Qənirə Paşayevanın sözlərinə görə, müstəqilliyini yenidən qazandıqdan sonra iqtisadi çətinliklərə, bir sıra ciddi daxili siyasi problemlərə baxmayaraq, Qırğızıstan inkişaf edir və öz inkişafında demokratiyanın inkişafını əsas tutur: “Ölüm hökmünün ləğv edilməsi, siyasi institutların inkişafı istiqamətində həyata keçirilən konstitusiya islahatları ilə bərabər azad və ədalətli seçkilərin keçirilməsi, siyasi və ictimai həyatda qadınlarla kişilərə bərabər imkanların tanınması, korrupsiyaya mübarizə sahəsində gördüyü işlər, qeyri-hökumət təşkilatlarının qanunverici və icra orqanlarının fəaliyyətinə cəlb olunması, yerli və lokal demokratiyanın inkişafı kimi bir sıra önəmli islahat və addımlar Qırğızıstanın seçdiyi yolu açıq göstərir və onlar Assambleya tərəfindən demokratiya üzrə tərəfdaş statusunun verilməsi bu istiqamətdə addımların sürətlənməsi üçün önəmli bir dəstək olacaq”.
Millət vəkili qeyd edib ki, Assambleya Qırğızıstana demokratiya üzrə tərəfdaş statusunu verməklə Bişkekin, Qırğızıstan parlamentinin, qeyri-hökumət təşkilatlarının demokratiyanın inkişafı, insan haqlarının müdafiəsi, fundamental azadlıqlar, qanun aliliyi ilə bağlı gördükləri işləri, səylərini daha da gücləndirəcək. “Qədim tarixi, gözəl mədəniyyəti olan və Avropa Şurası dəyərlərini bölüşən Qırğızıstana demokratiya üzrə tərəfdaş statusunun verilməsi həm də son günlər çox böyük gərginliklər və günlər yaşayan regionda Qırğızıstana veriləcək böyük dəstək olacaq. Assamleyamız tərəfindən Qırğızıstana demokratiya üzrə tərəfdaş statusunun verilməsi bu ölkə ilə təşkilatımız arasında əməkdaşlığı genişləndirəcək ki, bunun nəticəsində Qırğızıstanda demokratik instutların daha surətli inkişafı, bir sıra vacib islahatların sürətlə həyata keçməsinə də təkan verə bilər. Bu əməkdaşlığın genişlənməsi isə təkcə Qırğızıstan deyil, təşkilatımız üçün də önəmlidir. Bu əməkdaşlığın müsbət təsirininin gələcəkdə Mərkəzi Asiyaya daha geniş yayılmasına da təkan verə bilər ki, Avropa Şurası üçün bu çox önəmlidir. Mənim ölkəm Azərbaycanla Qırğızıstan arasında da əməkdaşlıq və əlaqələr daha da inkişaf edir və biz bu əməkdaşlığım genişlənməsinə böyük önəm veririk. Çıxışımın sonunda Qırğızıstan Parlamentindən olan dostlarımızı təbrik edirik və bu status alaraq Avropa ailəmizə xoş gəldiniz demək istəyirəm”, deyə Qənirə Paşayeva çıxışını yekunlaşdırıb.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
