Amerika rəsmilərinin bu petisiyaya rəsmi cavab vermələri üçün aprelin 20-nə kimi daha 92,5 min imza toplanması tələb olunur.
APA-nın “RİA-Novosti”yə istinadən verdiyi məlumata görə, martın 21-də saytda yerləşdirilən petisiyada “Alyaskanın ABŞ-dan ayrılmasına və onun Rusiyaya birləşməsinə səs verin” qeyd olunub.
Petisiyanın mətnində rusların Alyaskanı kəşf etməsi və orada məskunlaşması barədə məlumatlar vurğulanıb. Ağ Evin saytında bildirilir ki, petisiyanın müəllifi Ankoric şəhərindən olan sakindir. Onun adı S.V. kimi göstərilir. Bir sıra Rusiya KİV-i onun Sergey Voropayev olduğunu bildirirlər.
Qeyd edək ki, 2012-ci ilin noyabrında Ağ Evin saytında Texas ştatının ABŞ-dan ayrılması barədə petisiyanı 125 mindən çox insan imzalayıb. Rəsmilər isə “ABŞ yaradıcıları ştatların ayrılmasını nəzərdə tutmayıblar”, deyə cavab veriblər.