"Qırmızı Xaç" Ukraynada fəaliyyətini dayandırdı

Beynəlxalq Qırmızı Xaç Komitəsi Ukraynada fəaliyyətini dayandırıb

Beynəlxalq Qırmızı Xaç Komitəsi (BQXK) əməkdaşının Donbasda həlak olması səbəbindən Ukraynanın bütün ərazisində fəaliyyətini bir neçə günlük dayandırıb. Lent.az-ın APA-ya istinadən verdiyi xəbərə görə, bu barədə “RİA Novosti” məlumat yayıb.

“Biz əməliyyat fəaliyyətimizi bir neçə günlük dayandırdıq. Bizim üçün hazırda ən əsas məsələlər – Donetskdə olan nümayəndələrimizin təhlükəsizliyini və həlak olan əməkdaşımızın cənazəsinin İsveçrədəki ailəsinə tez bir zamanda çatdırılmasını təmin etməkdir”, deyə BQXK-nın Ukraynadakı mətbuat katibi Alina Mirzoyeva bildirib.

Xatırladaq ki, BQXK əməkdaşı, 38 yaşlı İsveçrə vətəndaşı Loran Etyen dü Paskye oktyabrın 2-də Donetsk mərkəzinin atəşə tutulması nəticəsində həlak olub.

Rəsmi Kiyev baş vermiş hadisədə separatçıları günahlandırıb.