“MTA 122 prezident və baş naziri izləyib”

ABŞ Milli Təhlükəsizlik Agentliyi (MTA) 122 dövlət və hökumət başçısını izləyib, dinləyib.

Lent.az-ın “Gazeta.ru”-ya istinadən məlumatına görə, bu haqda Almaniyada çıxan “Şpigel” ABŞ Mərkəzi Kəşfiyyat İdarəsinin keçmiş əməkdaşı Edvard Snoudenə əsaslanaraq, məlumat yayıb.

Həmin siyahıda Almaniyanın kansleri Angela Merkel, Belarus prezidenti Aleksandr Lukaşenok, Suriyadakı rejimin başçısı Bəşar Əsəd və başqa ölkələrin rəhbərlərinin adları var. Siyahıda sonuncu, 122-ci yerdə Ukraynanın keçmiş hökumət başçısı Yuliya Timoşenko durur.

Hər adın qarşısında xüsusi xidmət orqanlarının əldə etdikləri məlumatın sayı göstərilib. Mənbə bildirib ki, A.Merkelin adının qarşısında 300-ə yaxın məlumat yazılıb.

Məlumata əsasən, Merkelin izlənilməsi ABŞ xarici kəşfiyyat işləri üzrə məhkəmənin qərarı ilə gerçəkləşdirilib.