“LUKOYL” İraqda neft hasilatına başlayıb

Rusiyanın “LUKOYL” neft şirkəti İraqın “Qərbi Kurna-2” neft yatağında hasilata başlayıb.

Lent.az-ın “BBC”-yə istinadən məlumatına görə, 2010-cu ilin yanvarında bu yataq üzrə imzalanan müqavilə 20 illiyə nəzərdə tutulub, ancaq onun daha 5 il uzadılması istisna edilmir.

Neft hasilatının açılışı mərasimində Rusiya baş nazirinin müavini Arkadi Dvorkoviç, İraq baş nazirinin müavini Hüseyn əl-Şəhristani, ölkənin neft naziri Əbdülkərim Lueybi və “LUKOYL”-un prezidenti Vahid Ələkbərov iştirak edib.

«Bu ilin sonunadək sutkalıq hasilatı 400 min barelə çatdıracağımıza ümid edirəm. Bundan sonra da biz İraqa sərmayə qoyacağıq ” - deyə, V.Ələkbərov söyləyib.

O, qeyd edib ki, İraq hakimiyyəti və yerli sakinlərlə şirkət arasında çox yaxşı münasibət qurulub.

İraqın cənubunda, Bəsrə şəhərindən 65 km şimal-qərbdə yerləşən bu yataqda 14 milyard barelə yaxın neft ehtiyatı olduğu bildirilib.