Parlamentdə DAVA: Müxalifət məşəl yandırdı - VİDEO

Çərşənbə axşamı Serbiya parlamentində dava olub, müxalifət iclas zalında məşəl yandırıb.

Lent.az xarici KİV-ə istinadla xəbər verir ki, yaz sessiyasının ilk iclası başlayıb. Deputatlar 50-yə yaxın bənddən ibarət gündəliyi qəbul ediblər ki, bunlardan başlıcası noyabrın 1-də Novi-Sad dəmir yolu vağzalında baş vermiş uçqun nəticəsində 15 nəfərin ölümü ilə bağlı keçirilən kütləvi etirazlarla bağlı təhsil haqqında qanuna dəyişikliklərdir.

Gündəlik təsdiq edildikdən sonra müxalifətdə olan “Yaşıl-sol cəbhə”nin deputatı Radomir Lazoviç ayağa qalxıb ölkə rəhbərliyinə qışqıraraq rəyasət heyətinə tərəf yönəlib, ardınca onun partiya yoldaşları, zalın mərkəzində isə təhlükəsizlik xidmətinin əməkdaşları və Serb Tərəqqi Partiyasının ətrafında hakim koalisiya üzvləri ilə toqquşma olub.

Dava zamanı müxalifət deputatları məşəl yandırıblar və iclas otağı tüstü ilə dolub. Parlamentin spikeri Ana Brnabiçin üzərinə su atılıb.

Səs-küyə və xaosa baxmayaraq, baş nazirin birinci müavini və maliyyə naziri Sinişa Mali “Ali təhsil haqqında” qanuna dövlət universitetləri üçün maliyyənin, müəllimlərin maaşlarının 16 faiz artırılması və tələbələrin təhsil haqlarının 50 faizinin büdcədən ödənilməsi kimi təkliflər səsləndirib.