Əsəd rejiminin daha bir cinayəti ÜZƏ ÇIXDI: evlər məzarlığa dönüb

Suriyada Bəşər Əsəd rejiminin devrilməsindən 3 ay sonra onun cinayətləri ilə bağlı araşdırmalar davam edir. Ölkə vətəndaşları diktatorun hakimiyyəti dövründə sadiq qüvvələrin törətdiyi qırğınların yeni sübutlarını daha çox görürlər.

Lent.az xarici mediaya istinadla bildirir ki, xilasetmə xidmətlərinə evlərində məhv edilmiş bütöv ailələrin qalıqları barədə həyəcanlı xəbərlər daxil olub.

Dəməşq yaxınlığındakı Sbeyn bölgəsində dağılmış binalardan birinin zirzəmisində yanan sümük yığını aşkar edilib. Mülki müdafiə işçiləri qurbanların dəqiq sayını müəyyən etməkdə çətinlik çəkiblər, lakin ilkin hesablamalara görə, azı 20 cəsəd var. Qalıqların yanından güllə gilizləri tapılıb, kəllələrdən biri azyaşlı uşağa məxsus olub.

Qonşu Həcər Əsvədin sakinləri bildiriblər ki, vətəndaş müharibəsi zamanı yüzlərlə suriyalı Sbeyndan keçərək qaçmağa cəhd edib, lakin izsiz yoxa çıxıblar. İllər sonra əraziyə qayıdanlar onlarla cəsədlə rastlaşsalar da, rejimin repressiyalarından qorxaraq bu barədə məlumat verməkdən çəkiniblər.

Məhkəmə ekspertləri və müstəntiqlər deyirlər ki, Sbeyndəki qalıqlar dinc əhalini qorxutmaq üçün sadiq qüvvələr tərəfindən həyata keçirilən cəza əməliyyatlarının sübutudur. Bu kütləvi terror aktları üsyançıların nəzarətində olan ərazilərdə müqaviməti yatırmaq məqsədi daşıyıb.

“Ağ Dəbilqəlilər” xilasetmə təşkilatı indiyədək üç zirzəmidən 50-yə yaxın cəsədin çıxarıldığını, lakin ərazidəki digər yeddi yerin hələ də tədqiq edilmədiyini bildirib. Suriyanın digər bölgələrində kanalizasiya borularında, quyularda və tərk edilmiş binalarda da hələ də insan qalıqlarına rast gəlinir.

Suriya İnsan Haqları Şəbəkəsinin məlumatına görə, rejim həbsxanalarında 100 minə yaxın insan itkin düşüb. Lakin aşkar edilmiş çoxsaylı kütləvi məzarları nəzərə alsaq, qurbanların real sayı daha çox ola bilər.

Məhkəmə ekspertləri xəbərdarlıq edir ki, cəsədlərin DNT testi vasitəsilə şəxsiyyətinin müəyyən edilməsi prosesi illər çəkə bilər və Əsəd rejiminin törətdiyi vəhşiliklərin miqyası yalnız bütün eksqumasiya işləri başa çatdıqdan sonra bəlli olacaq.