Böyük Britaniya hökuməti ölkədə anti-immiqrasiya əhval-ruhiyyəsinin artması fonunda Əfqanıstan, Kamerun, Myanma və Sudan vətəndaşları üçün təhsil vizalarını dayandıracağını, həmçinin əfqanlar üçün iş vizalarını ləğv edəcəyini açıqlayıb.
Lent.az xəbər verir ki, bu barədə AlJazeera məlumat yayıb.
Böyük Britaniyanın Daxili İşlər Nazirliyi bu barədə bəyanat yayıb. Bəyanatda bildirib ki, tələbə vizası ilə ölkəyə gələn şəxslər arasında sığınacaq müraciətlərinin kəskin artmasından sonra dörd ölkənin vətəndaşları üçün ilk dəfə olaraq “fövqəladə əyləc” mexanizmi tətbiq edilib.
Nazirlik qeyd edib ki, 2021–2025-ci illər arasında Əfqanıstan, Kamerun, Myanma və Sudan vətəndaşı olan tələbələrin sığınacaq müraciətlərinin sayı 470 faizdən çox artıb.
Böyük Britaniyanın daxili işlər üzrə dövlət katibi Şabana Mahmood bildirib: “Britaniya müharibə və təqiblərdən qaçan insanlara həmişə sığınacaq verəcək, lakin bizim viza sistemimiz sui-istifadə olunmamalıdır”.
Mahmood əlavə edib ki, buna görə də hökumət ölkənin səxavətindən sui-istifadə etməyə çalışan şəxslərə vizanın verilməsindən imtina etmək barədə misli görünməmiş qərar qəbul edib.
İmmiqrasiya məsələsi Böyük Britaniyada siyasətin əsas mövzularından birinə çevrilib. Anti-immiqrasiya mövqeyi ilə tanınan ifrat sağçı Reform UK partiyası ictimai sorğularda sürətlə populyarlıq qazanır.
İctimai narazılığı azaltmaq və Reform UK partiyasının yüksəlişinin qarşısını almaq məqsədilə Baş nazir Keir Starmer hökuməti sığınacaq prosedurlarını sərtləşdirib və ölkəyə qeyri-qanuni daxil olan şəxslərin deportasiya prosesini sürətləndirib.
Böyük Britaniyanın Press Association (PA) agentliyi bildirib ki, viza qadağası cümə axşamı immiqrasiya qaydalarına ediləcək dəyişiklik vasitəsilə rəsmi şəkildə tətbiq olunacaq. Həmin gün daxili işlər naziri Şabana Mahmood sığınacaq prosedurlarının daha sərt olacağı ilə bağlı çıxış edəcək.
PA-nın məlumatına görə, hökumətin əvvəlcədən açıqladığı planlara əsasən yeni qaydalar qüvvəyə minəcək və Böyük Britaniyada sığınacaq istəyən şəxslərin qaçqın statusu hər 30 aydan bir yenidən nəzərdən keçiriləcək. Bu addım ölkəni sığınacaq axtaranlar üçün daha az cəlbedici etmək məqsədi daşıyır.
Daxili İşlər Nazirliyi bildirib ki, hökumət 2025-ci il ərzində tələbələr tərəfindən edilən sığınacaq müraciətlərini 20 faiz azaltmağa nail olsa da, təhsil vizası ilə ölkəyə gələn şəxslər hələ də sistemdəki bütün müraciətlərin 13 faizini təşkil edir və əlavə tədbirlərə ehtiyac var.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
