Blogger qadağan olunmuş adada vəhşi qəbilələrlə sağ qaldı – Qalmaqalın təfərrüatları - VİDEO

Ukrayna əsilli videoblogger Mixail Polyakov xarici dünya ilə əlaqəsi olmayan qəbiləyə qazlı içki şüşəsi qoyaraq Şimali Sentinel adasına qanunsuz daxil olub.

Lent.az xarici mediaya istinadla xəbər verir ki, qalmaqallı hadisə 2025-ci ilin mart ayında baş verib.

Bloggerin hədəfi Benqal körfəzində yerləşən və Hindistanın Andaman arxipelaqına daxil olan məşhur Şimali Sentinel adası olub. Bu ərazi rəsmi olaraq ciddi şəkildə qorunan təcrid zonası elan edilib. Hindistan hakimiyyəti burada yaşayan unikal, xarici dünya ilə əlaqə qurmayan sentinelli qəbiləsini xəstəliklərdən və müasir sivilizasiyanın təsirlərindən qorumaq məqsədilə adanı tam izolyasiya edib.

Polyakov açıq şəkildə bildirib ki, bütün riskləri əvvəlcədən anlayıb, lakin buna baxmayaraq qanunu bilərəkdən pozub.

Qadağan olunmuş əraziyə çatmaq üçün blogger Cənubi Andamandan kiçik motorlu qayıqla təxminən doqquz saat yol gedib. Məqsəd nöqtəsinə çatdıqdan sonra o, təxminən iki saat sahilə yaxın sularda qalaraq yerli sakinləri müşahidə etməyə çalışıb. Sonda ekstremal səyyah qısa müddətlik sahilə ayaq basıb. Yerli sakinlərin diqqətini çəkmək və bunu kameraya çəkmək üçün Polyakov yüksək səslə fit çalaraq işıq şüalarından istifadə edib. Lakin onun qəbilə üzvləri ilə tam əlaqə qurmaq cəhdi uğursuz olub.

Sahili tərk etməzdən əvvəl səyyah qəbilə üçün olduqca qəribə bir “hədiyyə”, şirin qazlı içki şüşəsi qoyub. Geri qayıdarkən isə Hindistan hüquq-mühafizə orqanları onu sahil yaxınlığında saxlayaraq həbs edib.

Polyakov jurnalistlərə bildirib ki, bu addımının hüquqi nəticələrini əvvəlcədən araşdırmışdı, lakin cəzanın çox ağır olmayacağını düşünürdü.

“Mən hesab edirdim ki, nəticələr çox ciddi olmayacaq və əsasən haqlı çıxdım”, - kontent müəllifi ironik şəkildə bildirib.

Nəticədə Hindistan məhkəməsi bloggerə gözlənilməz dərəcədə yüngül yanaşıb. O, təxminən 270 manata yaxın məbləğində cərimələnib. Bununla belə, bundan əvvəl hüquq-mühafizə orqanları onu üç həftə müddətində nəzarətdə saxlayıb.

Səfərdən bir il sonra Polyakov bu ekspedisiyaya aid unikal görüntüləri internetdə paylaşmağa başlayıb. O bildirir ki, təhlükəli turizmlə məşğul olmur, əksinə, fəaliyyətini vacib sənədli iş hesab edir.

Bloggerin sözlərinə görə, əsas məqsədi adi insanların görə bilmədiyi yerləri və hadisələri qeydə almaqdır. O, başqalarına bu təcrübəni təkrarlamağı tövsiyə etməsə də, özü artıq dünyanın ən ucqar və təcrid olunmuş bölgələrinə yeni ekspedisiyalar planlaşdırır.