Braziliyalı cütlük qeyri-adi bacarıqları ilə Ginnesin Rekordlar Kitabına düşüb. Renato Bayma Qaya və Nayara Roberta Ribeiru de Marins 30 saniyə ərzində 195 dəfə öpüşərək yeni dünya rekordu müəyyənləşdiriblər.
Lent.az xarici mediaya istinadla bildirir ki, bu barədə Ginnesin Rekordlar Kitabı məlumat yayıb.
Rekord Beynəlxalq Öpüş Günü ərəfəsində qeydə alınıb və bu səbəbdən cütlük üçün xüsusi əhəmiyyət daşıyıb.
32 yaşlı Renato və 33 yaşlı Nayara bildiriblər ki, bu rekordu birlikdə qırmağa qərar vermələrinin səbəbi özlərini "dünyanın ən yaxşı cütlüyü" hesab etmələridir.
Məlumata görə, hər ikisi həkim kimi çalışır və COVID-19 pandemiyası dövründə ön cəbhədə fəaliyyət göstəriblər. Onlar artıq bir il yarımdır ki, münasibətdədirlər.
Renato üçün ilk rekord deyil
Renato Bayma Qaya əvvəllər də bir neçə qeyri-adi dünya rekordu müəyyənləşdirib. O, 10 kitabı cəmi 6,68 saniyəyə düzüb aşırmaq, həmçinin ayağını 210,66 dərəcə bucaq altında çevirməklə rekord müəllifi olub.
Braziliyalı bildirib ki, bu dəfəki nailiyyət onun üçün daha xüsusi məna daşıyır. Çünki sevdiyi insanın adının da öz adı ilə birlikdə Ginnesin Rekordlar Kitabında yer almasını istəyib.
Növbəti hədəf – bir dəqiqədə ən çox öpüş
Qara kəmər sahibi olan Renato özünü "qələbələrdən asılı insan" adlandırır və daim yeni rekordlar qırmağa çalışdığını deyir.
Rekord cəhdi zamanı o, sevimli futbol komandası olan San Joze klubunun formasını geyinib. Renato sürətlə Nayaranın yanağından öpür, Nayara isə buna təbəssümlə cavab verirdi.
Cütlük bununla kifayətlənmək niyyətində deyil. Onların növbəti məqsədi bir dəqiqə ərzində ən çox öpüş rekordu qırmaqdır.
Hazırda bu rekord yaponiyalı Mister Çerri (Cherry Yoshitake) və Kumiko Şiratoriyə məxsusdur. Onlar 60 saniyə ərzində 277 dəfə öpüşərək bu göstəriciyə nail olublar.
Renato bildirib ki, rekordlarının məqsədi yalnız əyləndirmək deyil. O, insanları ruhlandırmaq və müsbət mesaj vermək istədiyini deyib.
Onun sözlərinə görə, özü sümük iliyi donorudur və diqqət çatışmazlığı və hiperaktivlik sindromundan (DEHB) əziyyət çəkir. Buna baxmayaraq, bu diaqnozu olan insanların da istədikləri məqsədə çata biləcəyini göstərmək istəyir.
Braziliyalı rekordçu ümid edir ki, onun uğuru daha çox insanı dünya rekordları qırmağa və adını Ginnesin Rekordlar Kitabına yazdırmağa həvəsləndirəcək.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
