Lazerli printerin ixtiraçısı vəfat etdi
22 yanvar 2020 19:04 (UTC +04:00)

Lazerli printerin ixtiraçısı vəfat etdi

ABŞ-da lazer şüası texnologiyasından istifadə edilməklə hazırlanan dünyada ilk lazerli printerin ixtiraçısı Hari Starkuezer dünyasını dəyişib.

Lent.az “ictnews”a istinadən xəbər verir ki, o, dekabrın 26-da 82 yaşında Florida ştatının Orlando xəstəxanasında vəfat edib. Ölüm səbəbi kimi leykemiya xəstəliyi göstərilir.

1938-ci ildə anadan olan H.Starkuezer 1960-cı ildə Miçiqan Universitetini bitirib. Orada fizika sahəsində bakalavr dərəcəsi alan mühəndis 1966-cı ildə Roçester Universitetinin məzunu olmaqla optika sahəsində magistr dərəcəsinə yiyələnib.

H.Starkuezer 60-cı illərin əvvəllərində “Xerox Corporation” şirkətində kiçik mühəndis vəzifəsinə işə götürülüb. “Xerox PARC” elmi tədqiqat mərkəzinin əməkdaşı olan mühəndis 1971-ci ildə lazer şüası texnologiyasına malik mövcud surətçıxarma aparatlarını tamamlayıb.

İlk lazerli printerin təcrübi nümunəsi H.Starkuezer tərəfindən 9 ay ərzində layihələndirilsə də, qurğunun kütləvi istehsalına başlanmayıb və prototip şəklində qalıb. Lazerli printerin ilk seriyalı modeli – “Xerox 9700 Electronic Printing System” 1977-ci ildə buraxılıb. 1990-cı illərdə işıq mənbəyinin lazer şüası qismində çıxış etdiyi texnologiyaya malik çap qurğuları dünyanın bütün ofislərinin ayrılmaz atributuna çevrilib.

90-cı illərdə “Apple Computer” şirkətində çalışan H.Starkuezer işıq idarəetmə texnologiyasını kəşf edib, eləcə də “Pixar” və “Lucasfilm” kimi şirkətlərdə məsləhətçi rolunda çıxış edib. 1997-ci ildə mühəndis “Microsoft” korporasiyasının “Microsoft Research” bölməsində çalışıb və displey texnologiyaları ilə məşğul olub.

# 1219
avatar

Oxşar yazılar