Millimizin əsas oyunçusu türk klubuna lazım olmadı - Klubsuz qaldı

Azərbaycan milli komandasının voleybolçusu Polina Rəhimova klubsuz qalıb. Apasport.az saytının məlumatına görə, milliləşən legioner son mövsümdə çıxış etdiyi Türkiyə “Fənərbaxça”sına lazım olmayıb.

Müqaviləsi başa çatan 5 oyunçu ilə yollarını ayırmağa qərar verən İstanbul nəhəngi Polinanın xidmətində maraqlı olmayıb. Hücumçunun Türkiyə karyerası bir mövsümdən artıq sürməyib.

“Fənərbaxça”nın heyətdəki islahatları uğursuz mövsümlə bağlıdı. Belə ki, istanbullular Türkiyə çempionatında yalnız bürünc medal qazanıb. Polina və komanda yoldaşlarının bu medalı isə son 5 mövsümün ən uğursuz nəticəsidi. 2014/15 və 2016/17 mövsümlərində qızıl, 2013/14 və 2015/16 mövsümlərində gümüş əldə edən istanbullular bu dəfə finala həsrət qalıb.