304
16:00
09 May 2009

Nazir: “Fərda Qədirov psixoloji cəhətdən normal olmayıb”

“Aprelin 30-da Azərbaycan Dövlət Neft Akademiyasında baş verən cinayət hadisəsi ilə bağlı istintaq gedir, geniş araşdırmalara başlanılıb”.

Lent.az-ın məlumatına görə, bunu jurnalistlərə açıqlamasında daxili işlər naziri Ramil Usubov deyib.

O bildirib ki, cinayətdə əlavə şəxslərin iştirak edib-etməməsi halı olubsa, istintaqın gedişində müəyyənləşəcək. R.Usubov eyni zamanda qeyd edib ki, hadisəni törədən Fərda Qədirov əslən Gürcüstandan olduğu üçün istintaq zamanı Gürcüstan tərəfi də Azərbaycana köməklik göstərir.

Nazirin sözlərinə görə, cinayət işinin motivi ilə də bağlı araşdırmalar gedir: «Hadisənin motivi araşdırılır. Dəqiq məlumat istintaqdan sonra məlum olacaq. Amma görünür ki, Fərda Qədirov psixoloji cəhətdən normal olmayıb”.

Hadisənin terror faktı olub-olmamasına gəlincə, nazir araşdırmaların davam etdiyini bildirib: «Hadisənin terror olub-olmamasını istintaq müəyyənləşdirəcək».

Şəhriyar Əlizadə