2034
writer1

Ramilə Qurbanlı

Məqalə sayı : 83

13:06 27 Avqust 2019

Nadirin azadlığı

 

Qadın gülərsə şu ıssız mühitimiz güləcək,

Sürüklənən bəşəriyyət qadınla yüksələcək.

(Hüseyn Cavid)

 

Nadir Qafarzadə deyib ki, pis qadının başını kəsmək lazımdır. Ondan daha betərini isə qadın və azadlıq barədə ərz edib: “Qadına tam azadlıq vermək olmaz. Qadın üçün çərçivə olmalıdır”. Çərçivədən çıxdısa başı kəsilməlidir - sözünün məntiq nəticəsi də buna gətirib çıxarır.

 

İndi hamı başlayıb ki, Nadirin dodağı belə, saçının boyası elə, yaxud oxumağı bir şey deyil və sair. Boş verin bunları. Nadirin dodağı şişirdilib – öz işidir. Saçı boyanıb, yenə özü bilər. İnsan azadlığına kimsə toxuna bilməz, yəni düzgün deyil. Dodaq onun, saç onun, bədən onun - necə istəyir, elə də rəngləsin. Bu, onun təbii haqqıdır.

 

İfasına gəldikdə, bu da bir zövq məsələsidir. Məsələn, mən deyirəm ki, “Fizuli kantatası”nı onun ifasında dinləyə bilmirəm, xoşuma gəlmir. Şövkət Ələkbərovanın şəxsiyyəti ilə sənətkarlığı üst-üstə o kantatanı şedevrə çevirib. Ondan sonra bu sənət əsərini oxuyan adam...

 

İnsanların ruhunu oxşayan adam zorakılığa, şiddətə çağıra bilməz e... Bunlar ikisi eyni adam ola bilməz. Adam da var, deyir, Nadir Qafarzadə lap Şövkət xanımdan da yaxşı ifa edib. Hərənin öz zövqü. Məsələ bunların heç biri deyil. Məsələ ondadır ki, Nadir Qafarzadəni biz belə şişirtmişik, rəyi soruşulacaq adamlar cərgəsinə yazmışıq. Bizim cəmiyyət. Onu ulduza çevirib, başımızın üstünə qaldırmışıq. O da ordan başlayıb...

 

Yenə neynəsə öz işidir, amma elə məsələlər var ki, orda onun azadlığı qurtarır, mənimki başlayır. Lütfən, burda dayan, mənim azadlığımla sənin işin yoxdur. Necə ki sənin botoksu azadlığınla mənim işim yoxdur. Necə ki sənin toylarda hoqqadan çıxmaq azadlığınla mənim işim yoxdur.

 

O sevdiyin çərçivəni özünə aid etmək mədəniyyətdəndir. Öz çərçivənin hüdudlarını da qadın azadlığının çərçivəsini bildiyin qədər bil. Qadın sənin şəxsi əşyan deyil ki, onun azadlığını çərçivədə görəsən. O çərçivə olsa yaxşıdır, amma onu qadın özü qoya bilər, başqasının həddi deyil.

 

Ona ətək-ətək pullar töküb övladlarımızın toyuna dəvət edən bizik. Televiziya ekranlarından əksik etmirik, efirlərdə mahnılarını səsləndiririk. Bəzən hansısa bir alimin, akademikin, mütəxəssisin yerinə onun fikrini öyrənirik, yayımlayırıq. Nadir Qafarzadə hüquq müstəvisində niyə fikir deməlidir ki?

Ən qorxulusu da bilirsiniz nədir? Bu gedişlə, bir də gördün, millət vəkilliyinə namizədliyini də verdi. Ona pul verən, efir verən, aid olmadığı mövzularda söz demək səlahiyyəti verən bizlər sabah səsimizi də verdik bu adama. Olmaz? Elə olar ki! O da oldu millət vəkili. Hətta Milli Məclisdə insan hüquqları ilə bağlı komissiyaya da üzv ola bilər. Onda nolacaq?

 

Məşhur lətifədə deyildiyi kimi, heç nə, biabır olacağıq...