Minsk-2019: Azərbaycan avarçəkəni medal şansını itirib - YENİLƏNİB

Belarusun paytaxtı Minskdə keçirilən II Avropa Oyunlarında kayak və kanoelərdə avarçəkmə yarışları davam edir.

APA-nın Minskə ezam olunmuş əməkdaşının məlumatına görə, Azərbaycan millisinin bu idman növündəki yeganə təmsilçisi Mariya Lorena Manolitsa mükafatlar uğrunda mübarizəni dayandırıb.

Qadınlar arasında 1 nəfərlik qayıqla 200 m məsafəyə yarışan rumıniyalı legioner təsnifat mərhələsini uğurla adlasa da, yarımfinal cəhdi uğursuz alınıb.

Finiş xəttinə 43,071 saniyəyə çatan xanım idmançı ilk yarımfinalın 9 iştirakçısı arasında 8-ci olub. O, sabah keçiriləcək B finalında 9-16-cı yerlər uğrunda mübarizə aparacaq.

15:41

Belarusun paytaxtı Minskdə keçirilən II Avropa Oyunlarında kayak və kanoelərdə avarçəkmə yarışları davam edir.

APA-nın Minskə ezam olunmuş əməkdaşının məlumatına görə, bu idman növündəki yeganə Azərbaycan təmsilçisi mübarizəyə başlayıb.

Qadınların K-1 növü üzrə 200 metr məsafəyə yarışlarında Mariya Lorena Manolitsa ilkin mərhələdə qüvvəsini sınayıb. Finişə 44,750 saniyəyə çatan təmsilçimiz ilk qrupda 6-cı olub. O, bu göstərici ilə yarımfinal mərhələsinə yüksəlib.

Qeyd edək ki, bu mərhələnin yürüşləri Bakı vaxtı ilə saat 17:00-da başlayacaq.