“Eurovision” təmsilçilərimiz Ermənistanda da çıxış etməyə hazırdırlar

Bu il Azərbaycanı “Eurovision-2011” müsabiqəsində təmsil edəcək Eldar Qasımov və Nigar Camal “Komsomolskaya pravda” qəzetinin Ukrayna versiyasında oxucularının suallarını cavablandırarkən Ermənistanda çıxış etməyə hazır olduqlarını bildiriblər.

Lent.az-ın “Komsomolskaya pravda” qəzetinə istinadən verdiyi məlumata görə, oxuculardan birinin “əgər “Eurovision” İrəvanda keçirilsəydi, ora gedərdiniz?” sualına təmsilçilərimiz belə cavab verib: “Biz həmişə bütün ölkələrdən dəvət gözləyirik. Biz hər yerdə keçirilən konsertlərdə iştirakdan şad olarıq”.

“Eurovision” müsabiqəsi üzrə Azərbaycanın təşkilat komitəsindən Lent.az-a təmsilçilərin cavabının düzgün olduğunu bildiriblər: “Bu sual qarşısında onların verdikləri cavab düzgün cavabdır. Bildiyiniz kimi, musiqi və idman yarışlarında siyasi məsələlər qaldırıla bilməz. Bizdə keçirilən beynəlxalq idman yarışmalarına Ermənistandan gələn olub. Eləcə də beynəlxalq musiqi yarışmalarına tərəflər gedə bilər”.

Xəyalə