“Donuz qripi”nə yoluxmuş azərbaycanlılardan biri evə buraxıldı

Azərbaycanda A/H1N1 (“donuz qripi”) virusuna yoluxmuş iki nəfərdən biri - Elmi Tədqiqat Ağciyər Xəstəlikləri İnstitutunda müalicə olunan xəstə bu gün evə buraxılıb.

Bu barədə APA-ya Səhiyyə Nazirliyinin tibbi yardımın təşkili şöbəsinin müdiri Soltan Əliyev bildirib. Onun sözlərinə görə, xəstədə tam sağalma baş verib: “Vaxtında aşkar olunduğuna və dərhal ən müasir vasitələrlə müalicə aldığına görə, sağalma da tez baş verdi. Daha onun xəstəxanada saxlanmasına ehtiyac yoxdur”.

Xəstənin xəstəxanada vaxtından artıq saxlandığını deyən şöbə müdiri bildirib ki, onun ev şəraitində nəzarət altında saxlanmasına da heç bir ehtiyac yoxdur.

Virusa yoluxmuş digər xəstənin də vəziyyətinin yaxşı olduğunu deyən S. Əliyevin sözlərinə görə, yaxın günlərdə o da evə buraxılacaq.