“Miss Azərbaycan-2010”un təşkilatçıları polisə verildi

Günay və Nazim Səmədovlar dələduzluqda günahlandırılır

“Miss Azərbaycan-2010” gözəllik müsabiqəsinin təşkilatçılarından iki nəfərlə bağlı polisə müraciət edilib. Bu barədə Lent.az-a müsabiqənin əsas təşkilatçısı, “Nur” prodakşnın rəhbəri Nuriyə Əhmədovanın vəkili Əkbər Bağırov məlumat verib.

Belə ki, müsabiqədəki maliyyə fırıldaqları ilə bağlı müsabiqənin baş prodüseri Nazim Səmədov və direktoru Günay Səmədovanın əməllərində cinayət əməllərinin olması iddiası ilə Nuriyə Əhmədova tərəfindən Nərimanov rayon Polis İdarəsinə ərizə ilə müraciət olunub. Ərizə idarəyə iyunun 7-də verilib.

Ərizədə Səmədovların maliyyə fırıldaqları ilə məşğul olduğu, külli miqdarda pul mənimsəmək üçün dələduzluq etdiyi iddia olunur.

Qeyd edək ki, Səmədovlara qarşı irəli sürülən iddialar sübuta yetirilərsə, onlar Cinayət Məcəlləsinin 178.3 (dələduzluq, külli miqdarda ziyan vurmaqla törədildikdə) maddəsilə təqsirləndiriləcək. Belə olacağı təqdirdə onları 3 ildən 7 ilədək həbs cəzası gözləyir.

Pərvin ABBASOV