Abramoviç Londondan Bakıya 40 min funta yemək gətizdirib
28 iyul 2009 10:00 (UTC +04:00)

Abramoviç Londondan Bakıya 40 min funta yemək gətizdirib

Böyük Britaniyada Rusiyanın varlı şəxsləri haqqında kitab çapdan çıxıb.

Lent.az-ın məlumatına görə, Mark Hollinqsuort və Stüart Lenslin müəllifi olduğu əsər “Londonqrad və ya Rusiyadan pullarla: Oliqarxların daxildən görünən tarixi” adlanır.

9 funt sterlinq dəyərində olan kitabın girişində bu sözlər yazılıb: “İnanılmaz dərəcədə varlı insanların hədsiz qaba, zövqsüz və zalım xüsusiyyətləri xoşunuza gəlirsə, bu kitab sizin üçündür”.

Əsərdə rusiyalı milyarderlərlə bağlı bir sıra əhvalatlar nəql olunur. Onlardan biri daha maraqlıdır: İngiltərənin “Çelsi” klubunun sahibi Roman Abramoviç Bakıya səfəri zamanı (səfər tarixi göstərilməyib – E.M.) Londondakı “Ubon” restoranından suşi sifariş edib. Həmin yemək çatdırılma xərci ilə birgə Abramoviçə 40 min funta başa gəlib.

Müəlliflər alüminium maqnatı Oleq Deripaski, hazırda həbsdə olan YUKOS-un keçmiş rəhbəri Mixail Xodorkovski və Rusiya rəhbərliyinin qəzəbinə tuş gələn Boris Berezovskinin həyatı haqda da yazıblar. Kitabda qeyd olunur ki, hazırda Londonda yaşayan 300 minədək rus öz icmalarını “Temzada Moskva” adlandırıblar. Həmin emiqrantlardan 100 minə qədəri hədsiz varlıdır. Oliqarxlar impressionistlərin çəkdikləri şəkilləri alırlar.


Berezovskinin villasının isə 20,5 milyon funt qiyməti var. Həmin evə vertolyotla baxarkən, hətta elektrik işlərinə böyük məbləğdə xərc çəkildiyi görünür. Məsələn, 5 min mil uzaqlıqdan evin qapısını kimin döydüyünü görmək mümkündür.

Varlılar “Bugatti” və “Lamborghini” markalı avtomobillər, həddən artıq bahalı yaxtalar alırlar. Kitabda rusiyalı oliqarxlarla ünsiyyətdə olan britaniyalı tanınmış şəxslərin adları da göstərilib. Həmin şəxslərdən biri də müğənni Elton Condur.

Elşən Məmmədov
# 1345

Oxşar yazılar