Azərbaycan millisi yoldaşlıq görüşü üçün daha bir rəqib tapdı
21 oktyabr 2010 12:15 (UTC +04:00)

Azərbaycan millisi yoldaşlıq görüşü üçün daha bir rəqib tapdı

Lent.az-ın əldə etdiyi məlumata görə, yığmamız 2011-ci ildə Tunislə qarşılaşacaq.

Hələlik oyunun tarixi və yeri haqda heç bir dəqiq bilgi yoxdur. Amma o məlumdur ki, millimiz martın 29-da səfərdə Belçika ilə keçirəcəyi 2012-ci il Avropa çempionatının seçmə qrup matçı öncəsi Afrika təmsilçisini sınağa çəkəcək.

AFFA-nın Mətbuat və İctimaiyyətlə Əlaqələr Departamentinin rəhbəri Mikayıl Quliyev Lent.az-a açıqlamasında xəbəri nə təsdiq, nə də təkzib edib. Quliyev Azərbaycanın Tunislə görüşəcəyi barədə heç bir rəsmi məlumata malik olmadıqlarını bildirib. Onun sözlərinə görə, hazırda bir neçə ölkə ilə bu istiqamətdə danışıqlar aparılır. Hər hansı ölkənin futbol qurumu ilə razılıq əldə olunandan sonra ictimaiyyətə açıqlama veriləcək.

Qeyd edək ki, yığmamız noyabrın 17-də Çernoqoriya ilə yoldaşlıq görüşü keçirəcək.
# 517

Oxşar yazılar