[b]Bakıda əfsanəvi ingilis personajların paradı başladı - FOTOLENT[/b]

Mayın 29-da Bakı Olimpiya Stadionunda keçiriləcək UEFA Avropa Liqası turnirinin final oyununda İngiltərəni təmsil edən 2 komanda –“Çelsi” və “Arsenal” mübarizə aparacaq.

ONA-nın məlumatına görə, möhtəşəm derbi ilə əlaqədar yerli Təşkilat Komitəsi maraqlı layihəyə imza atıb.

Bu gündən başlayaraq, mayın 29-na kimi əfsanəvi ingilis personajlar - Ceyms Bond, Böyük Britaniya kraliçası II Elizabet, onun mühafizə dəstəsi, əfsanəvi rok qrupu “Bitlz”, dünya şöhrətli komediya ustası Çarli Çaplin, “Queen” qrupunun vokalisti Freddi Merkuri, “Alisa möcüzələr diyarında” əsərinin qəhrəmanları, Harri Potter və dostları, ingilis xalqının sevimli nağıl qəhrəmanı –Robin Qud, dahi dramaturq Uilyam Şekspir, xəfiyyə Şerlok Holms və digərləri Bakının müxtəlif yerlərində musiqili parad edəcəklər.

Bu gün ilki baş tutmuş parad “Port Baku Mall”dan başlayaraq, Kukla Teatrını və şəhərin mərkəzini – Nizami küçəsini, Qoşa Qala qapısını əhatə edib. Paradın qəhrəmanları sakinlər tərəfindən maraqla qarşılanıb, onlarla şəkillər çəkdirilib. Personajların növbəti günlərində Bakının hansı nöqtəsində üzə çıxacağı isə sakinlər üçün sürpriz olacaq.

Tanınmış ingilis qəhrəmanların son dayanacağı isə mayın 29-da böyük derbinin keçiriləcəyi Bakı Olimpiya Stadionudur.