Elçin Quliyev və iranlı həmkarı birlikdə bayram qeyd etdilər - FOTO
21 mart 2019 11:20 (UTC +04:00)

Elçin Quliyev və iranlı həmkarı birlikdə bayram qeyd etdilər - FOTO

Azərbaycan və İran sərhəd mühafizə orqanlarının rəhbərlərinin son görüşündə Novruz bayramının birgə qarşılanması haqqında qərar qəbul olunub.
 
Dövlət Sərhəd Xidmətinin mətbuat mərkəzindən ONA-ya verilən məlumata görə, mart ayının 20-dən 21-nə keçən gecə Dövlət Sərhəd Xidmətinin rəisi general-polkovnik Elçin Quliyevin və İran Sərhəd Qoşunlarının Komandanı general-mayor Qasım Rzayinin rəhbərliyi altında nümayəndə heyətlərinin birgə iştirakı ilə dövlət sərhədində “Novruz” bayramı münasibətilə bayram tədbiri təşkil olunub.
 
Azərbaycan və İran dövlət himnlərinin ifasından sonra nümayəndə heyətlərinin rəhbərləri Fəxri Qarovulların önündən keçiblər. Tədbir çərçivəsində keçirilmiş görüşdə sərhəd təhlükəsizliyinin təminatı, buraxılış məntəqələrində etibarlı sərhəd nəzarətinin təşkil edilməsi, transsərhəd cinayətkarlığın təzahürləri ilə mübarizə sahəsində yüksək nəticələrin əldə edilməsi məqsədilə sərhəd mühafizə orqanlarının fəaliyyətinin əlaqələndirilməsi, operativ məlumat mübadiləsinin aparılması, ikitərəfli görüşlərin keçirilməsi üzrə ardıcıl tədbirlərin davam etdirilməsinin vacibliyi vurğulanıb.
 
Tədbir iştirakçılarını təbrik edən general-polkovnik E.Quliyev və general-mayor Q.Rzayi öz çıxışlarında milli-mənəvi dəyərlərə dərin bağlılığı, tarixi-mədəni keçmişə yüksək ehtiramı nümayiş etdirən, bolluq, bərəkət və barış rəmzi olan “Novruz” bayramı münasibətilə ən səmimi arzularını ifadə edib, Azərbaycan və İranın sərhədçilərinə müqəddəs sərhədlərin mühafizəsi üzrə şərəfli fəaliyyətlərində müvəffəqiyyətlər arzulayıblar. Sonra Azərbaycan və İran sərhədçilərinin döyüş fəaliyyətinə həsr edilmiş sənədli filmlər nümayiş olunub və qarşılıqlı hədiyyələr təqdim edilib. 
 
Bayram tədbiri musiqiçilərin konsert proqramı ilə davam etdirilib və atəşfəşanlıqla yekunlaşdırılıb.
# 968
avatar

Oxşar yazılar