“Bizi hansısa sürpriz gözləyə bilər” – Qurban Qurbanov

“İlk oyunda qələbə qazanmağımıza baxmayaraq, ciddi rəqibə qarşı oynayırdıq”. Apasport.az saytının məlumatına görə, bunu “Qarabağ”ın baş məşqçisi Qurban Qurbanov deyib.

Ağdam klubu Çempionlar Liqasının I təsnifat mərhələsinin cavab matçı çərçivəsində sabah Sloveniya klubu “Olimpiya”nı qəbul edəcək.

Matçöncəsi təşkil edilən mətbuat konfransında Qurbanov fikrini bu sözlərlə davam etdirib: “Daha çox fikirləşmək lazım olacaq. Bizi çətin və maraqlı oyun gözləyir”.

- İlk oyundan fərqli sabah heyətdə dəyişiklik gözlənilirmi?

- Dəyişiklik ola bilər. Amma ciddi bir fərq gözlənilmir.

- Halldorssonun meydana çıxmaq ehtimalı varmı?

- Azdı. Amma iştirak ərizəsində olacaq.

- Hücumçu axtarışınız nə yerdədi? Macarıstanlı Balaş Dzudzakın “Qarabağ”a keçmək variantı nə dərəcədə realdı?

- Bu, son illərin ən çox verilən sualıdı. Ən çox axtarışda olduğumuz mövqe hücumçdu. Amma dediyiniz oyunçu ilə bağlı məlumatım yoxdu. Bəlkə də, siyahımızda olub. Hücuma ən azı 1 oyuncu cəlb etmək istəyirik. Axtarışlar davam edir.

- Bu, sizin avrokuboklarda 80-ci oyununuz olacaq. Bundan əvvəlki 79 matçın hansı sizin üçün xüsusidi?

- 80-ci oyun barədə düşünmürəm. Bu, bizim ilk mərhələ oyunumuz olacaq. Hər il daha yaxşı nəticə əldə etməyə çalışırıq. Səfərdə qalib gəlsək də, çox çətinliklə üzləşdik. Yüksək səviyyəli rəqiblə qarşılaşırıq. Bizi hansısa sürpriz gözləyə bilər. Yaddaqalan oyunlar olub. Ötən il “Kopenhagen”lə pley-off oyununu qeyd edə bilərəm. Azərbaycanda futbola sevgi, “Qarabağ”a inam yaradan “Rusenborq”la qarşılaşma da xüsusi idi. Səhv etmirəmsə, Ağdamın işğalı günü idi. Həmin oyun həm rəhbərliyə, həm futbolçulara böyük inam verdi.