"Somali"nin narkoman komandiri: "Xivi" necə "Givi" oldu? – TERRORÇUNUN SONU

Bu gün səhər Ukraynada qondarma “Donetsk Xalq Respublikası”nın liderlərindən biri, “Somali” batalyonunun komandiri, “Givi” ləqəbli məşhur terrorçu Mixail Tolstıx öldürülüb.

Tolstıx yerli vaxtla saat 06:12-də qətlə yetirilib. Hələ ki onun hansı şəraitdə öldürüldüyü dəqiq bəlli deyil. Hadisə yerində separatçıların istintaq qrupu işləyir.

“Donetsk Respublikasının xəbərləri” adlı agentlik “Givi”nin kabinetində törədilmiş partlayış nəticəsində öldüyünü xəbər verib. Donetsk separatçılarının keçmiş komandiri İqor Strelkov isə özünün “VKontakte”dəki səhifəsində “Givi”nin otağına “Şmel” odsaçan qurğusu ilə atəş açıldığını yazıb.

M. Tolstıx və onun komandiri olduğu “Somali” batalyonu Donbasda gedən döyüşlərin aktiv iştirakçısı olub. Ukrayna tərəfi onları hərbi cinayətlər törətməkdə ittiham edirdi. “Givi”nin əsir düşmüş Ukrayna əsgərlərini alçaltması, onlara işgəncə verməsi, hətta bəzi əsirləri güllələməsi barədə faktlar var.

“Givi” “Motolla” ləqəbli terrorçudan sonra öldürülən separatçıların ikinci ən böyük fiqurudur. 1980-ci ildə Donetsk vilayətinin İlovaysk qəsəbəsində anadan olan Tolstıx əsir ukraynalı döyüşçülərə qarşı qəddarlığa ilə tanınırdı. Ukrayna mətbuatının yazdığına görə, bu da təsadüfi deyilmiş. Sən demə Mişa hələ lap uşaqlıqdan qapazaltı olub. Həm məktəbdə, həm də ondan sonra yaşıdlarıyla yola getmirmiş. Buna səbəb isə onun dərsdən qaçıb futbola gedən sinif yoldaşlarını mütəmadi olaraq məktəb direktoruna satması imiş. Məhz bu səbəbdən tez-tez yaşıdları tərəfindən döyülərmiş. Futbol demişkən, Donetsk “Şaxtyor”unun azarkeşi olub Tolstıx. Sevimli futbolçusu isə Kriştianu Ronaldo.

Rus mətbuatının yazdığına görə, o, 1988-90-cı illərdə Ukrayna ordusunda xidmət edib. Amma sən demə, hərbi komissarlıqda tibbi müayinədən keçə bilməyib. Psixolji problemlərinə görə.

Bir müddət sürücü, sonra isə supermarketdə mühafizəçi işləyib.

Hələ uşaq vaxtından narkotikə meylli olub. Bunu İlovayskdakı qonşuları da təsdiq edir

“7-8 siniflərdə oxuyanda o artıq narkotikdən istifadə edirdi. Şəhərin kənarında yerləşən binaların zirzəmilərinə narkomanlar yığışırdı. Anası hər dəfə onu oradan tapıb evə gətirirdi”.

Anası demişkən, Tolstıxın atası onu uşaq vaxtı atıb gedib. Atasız böyüyən Mişa isə anasına zülm edirmiş. Yuxarı siniflərdə oxuyanda anasını belə döyürmüş.

“Givi” ləqəbini götürməsini hər yerdə babalarının gürcü əsilli olmasıyla izah edirmiş. Əslində elə deyil. Sən demə, Mixailin yeniyetməlik və gənclik ləqəbi “Xivi” olub. Bunu isə onu tanıyanlar qeyri-ənənəvi cinsi orientasiyaya meylliyi ilə izah edirlər.

“Dəhşət çox içirdi. Bəzən günlərlə əynini dəyişmirdi. Bomj kimi gəzirdi. Həm də “mavi”liyə meylli idi. Elə İlovayskda buna görə, ona “Xivi” adını vermişdilər. Qəsəbədə hamı onu “Xivi” deyə çağırırdı. Separatçılara qoşulandan sonra isə ləqəbində bir hərfin yerini dəyişib “Givi” oldu. Gürcü kökənli olduğunu iddia etməsi isə gülüncüdür”.

Rəzil gündə olan Tolstıx separatçılara 2014-cü ilin mayında qoşulur. Və təbii ki pul müqabilində. Və burada onun necə deyərlər, bütün potensialı açılır. Hərbi əsirlərə qarşı qəddarlığı ilə seçilir. Deyilənə görə, əsirlərin çoxunu şəxsən özü güllələyirmiş. Güllələmişdən qabaq isə işgəncə verirmiş. Tezliklə ətrafına elə özü kimilərdən ibarət dəstə yığa bilir. Həmin dəstəyə isə “Somali” batalyon adını verirlər.

“Givi” haqqında Vladimir Jirinovski də xəbər tutur. Bir dəfə o, “Giviyə 300 min dollar və bir neçə CİP göndərir. Eyni zamanda digər partiya sədrlərini də “Somaliyə” kömək etməyə çağırır.

“Somali” Donetsk aeroportunun tutulması əməliyyatında iştirak edib. Həm bu, həm də digər əməliyyatlar nəticəsində əsir düşən ukraynalı hərbçilərin təhvil verilməsinin qəti əleyhdarı olub.

Mixail Tolstıx ailəli olmayıb. Onun bir neçə sevgilisi olub ki, onların da çoxunu şantaj edərək agent kimi istifadə edib.

“Givi” iki dəfə yaralanıb. Bir dəfə onun maşının partladıblar, amma sağ çıxıb. İkinci dəfə əməliyyat zamanı yaralansa da, yarası yüngül olub. Nəhayət, bu gün səhər kabinetindəcə partladılıb.

“Givi” Donbasda savaş başlayandan bəri "Motorolla" ləqəbli digər terrorçu Arsen Pavlovla birlikdə önə çıxan fiqurlardan biri idi. Onlar əsir düşmüş Ukrayna əsgərlərinə şəxsən işgəncə verirdilər və hətta əsirlərdən bir neçəsini şəxsən güllələyiblər. “Motorola” ötən ilin oktyabrında çox peşəkarcasına təşkil olunmuş sui-qəsdlə öldürülüb. O, yaşadığı binanın liftinə daxil olub, düyməni basdıqdan sonra liftdə güclü partlayış baş vermişdi.

“Givi” və “Motorolla”dan başqa, indiyə qədər separatçıların digər bir neçə lideri də qeyri-döyüş şəraitində öldürülüb.